«Հայրիկյանի վրա կրակելը բոլորիս համար սառը ցնցուղ էր, ամեն ինչ կարելի էր սպասել, բացի դրանից: Դա, ըստ էության, ուղղված էր ոչ թե Հայրիկյանի, այլ իշխանության եւ ընտրությունների դեմ: Հայրիկյանն ամենանպատակային թիրախն էր եւ, ըստ երեւույթին, ընտրված էր: Նա մեծ հեղինակություն ունի եւ բոլորիս այդ դեպքը ցավ է պատճառել` անկախ Հայրիկյան քաղաքական գործչի կերպարից»,-այսօր «Տեսակետ» ակումբում կարծիք հայտնեց Գրականության ինստիտուտի փոխտնօրեն, գրականագետ Վարդան Դեւրիկյանը: Նրա խոսքով` Հայրիկյանի մեծահոգության շնորհիվ ընտրությունները չեն հետաձգվի. «Միայն ընտրությունների հետաձգման դեպքում այդ կրակոցը կհասնի նպատակին»: Դեւրիկյանը նաեւ ասաց, որ ընտրությունների հետաձգման պարագայում աշխարհը չի քանդվի. «Բայց մենք ժամանակ կկորցնենք եւ ընտրությունների զարգացման տեմպը: Մեր տարածաշրջանը նման է վառոդի տակառի, որի վրա գտնվելով` մենք կորցրել ենք իրականությունը: Այնպես որ` ցանկացած սպասողական վիճակ խանգարում է տեմպի զարգացմանը»:
«Եթե գործ էիք անում, մի շնորհքով անտեր գտնեիք, թող աներ: Կրակող էիր` մարդավարի կրակեիր, ասեիր` արել եմ գործս: Ի՞նչ կարիք կար անտաղանդ ձեւով տեռոր անելու: Այդքան տարածության վրա էլ չկարողանա՞ս մարդավարի կրակել:
Կիսատ-պռատ անշնորհքությունների շարան է»,-ասաց «Ագուլիս» տիկնիկային թատրոնի հիմնադիր Երվանդ Մանարյանը: Ապա շարունակեց. «Կրակողն էլ է անշնորհք, կրակողին ուղարկողն էլ: Եթե Հայրիկյանին բան ունեիք ասելու, գնայիք մարդավարի դեմը կանգնեիք-ասեիք: Չեմ կարծում, որ կգտնվի այնպիսի հայ, որը դեպքն ինչ-որ կերպով ուզենա իրեն հարիր համարել»:
Ինչ վերաբերում է դրսի ուժերի վարկածին, Մանարյանն ասաց. «Դրսի ուժերի հերն էլ…հերիք է «դրսի ուժեր» ասեք: Կատարվածի վերաբերյալ Հայաստանի հեղինակության անկման հարց չի կարող լինել, որովհետեւ աշխարհում այնքան «անհեղինակավոր» պետություններ կան, որ դրանց շարքը Հայաստանով համալրվելը բան չի փոխի: Արաբական աշխարհն իրար ետեւից այնքան հիմարություն արեց, որ հայի արածը չի երեւա»:
Կարդացեք նաև
Պարոն Մանարյանը նույնպես այն կարծիքին է, որ ընտրությունները չպետք է հետաձգվեն:
Լուիզա ՍՈՒՔԻԱՍՅԱՆ
