«Սերժ Սարգսյանը մրցակցությունից դուրս է». ռուսական «Նեզավիսիմայա Գազետա» թերթը այսպիսի վերնագրով հոդված է հրապարակել Հայաստանի նախագահական ընտրությունների քարոզարշավի շրջանի մասին: Հոդվածագիրը, խոսելով նախագահի թեկնածու Պարույր Հայրիկյանի նկատմամբ մահափորձի մասին, տարակուսում է, որ դա կարող էր տեղի ունենալ քաղաքական դրդապատճառներով:
«Մոտեցող նախագահական ընտրությունները խոստանում էին լինել ամենատխուրը Հայաստանի ամբողջ հետխորհրդային ժամանակաշրջանի համար: Երկրում քաղաքական դաշտն այսօր այնպիսին է, որ գործող նախագահ Սերժ Սարգսյանի հետ մրցակցել թերևս կարող էին նախկին նախագահ Ռոբերտ Քոչարյանը կամ էլ «Բարգավաճ Հայաստան» կուսակցության առաջնորդ Գագիկ Ծառուկյանը»,- գրում է թերթը՝ նշելով, որ ընտրությունների քարոզարշավից առաջ Քոչարյանը հայտարարեց, որ սխալ է համարում դեմ գնալ Սարգսյանին, որին ինքն է ցանկացել տեսնել այդ պաշտոնում իր նախագահությունից հետո:
«Իսկ երբ Երևանում փորձագիտական շրջանակներում քննարկում էին «վրացական սցենարի» հավանականությունը, այսինքն՝ ընտրություններում միլիարդատիրոջ հաղթանակը, որպիսին Ծառուկյանն է, «Բարգավաճ Հայաստանի» առաջնորդը որոշեց չբարդացնել Սերժ Սարգսյանի կյանքը: Հնարավոր է՝ իրենը նույնպես: Այսպիսիով գործող նախագահը մտավ ընտրական գործընթացի մեջ՝ ունենալով ընդամենը նոմինալ մրցակիցներ և ընտրությունների առաջին փուլում վստահ հաղթելու մեծագույն հնարավորություններ»:
CIVILNET
