Իջեւան քաղաքի բնակիչ, 1975թ. ծնված Արմեն Ասիլբեկյանին մեղադրանք էր առաջադրվել, որ նա հանդիսանալով ՀՀ պաշտպանության նախարարության զորամասերից մեկի համալրման բաժանմունքի պետ, անձնական դրդումներով իր ենթակայի՝ համալրման բաժանմունքի ավագ սպայի թվացյալ թերությունը թաքցնելու նպատակով չարաշահել է պաշտոնական դիրքը՝ զորամասի ժամկետային զինծառայողների հաշվառման մատյանում կեղծում է կատարել, շարքային Հ. Բաղդասարյանի արձակուրդից վերադառնալու օրը 2012թ. մայիսի 15-ից դարձրել է մայիսի 18-ը:
Այնուհետեւ մայոր Ա. Ասիլբեկյանը շարքային Հ. Բաղդասարյանի արձակուրդից ուշ վերադառնալու կապակցությամբ նախապատրաստվող նյութերի ընթացքում իր կատարած կեղծիքը թաքցնելու նպատակով կազմել եւ Իջեւանի ռազմական ոստիկանության աշխատակիցներին է ներկայացրել հրամանի կեղծ քաղվածք, թե իբր զորամասի հրամանատարի կողմից շարքային Հ. Բաղդասարյանին արձակուրդ է տրվել 8 օր ժամկետով:
Արմեն Ասիլբեկյանի նկատմամբ խափանման միջոց էր ընտրվել չհեռանալու մասին ստորագրությունը: Նրան մեղադրանք էր առաջադրվել ՀՀ քրեական օրենսգրքի 375 հոդվածի 1-ին մասով («Իշխանությունը չարաշահելը, իշխանազանցությունը կամ իշխանության անգործությունը»): Այդ հոդվածը նախատեսում է 2-5 տարվա ազատազրկում:
Արմեն Ասիլբեկյանը դատարանում հայտարարել էր, որ համաձայն է իրեն առաջադրված մեղադրանքի հետ եւ միջնորդել էր անցկացնել արագացված դատաքննություն: Դատարանը բավարարել էր այդ միջնորդությունը:
Կարդացեք նաև
Հունվարի 22-ին Տավուշի մարզի առաջին ատյանի դատարանի դատավոր Ռաֆիկ Մելքոնյանը Արմեն Ասիլբեկյանին դատապարտեց 2 տարվա ազատազրկման: Որպես պատիժը եւ պատասխանատվությունը մեղմացնող հանգամանք դատարանը հաշվի է առել, որ Ասիլբեկյանն իր խնամքի տակ ունի մինչեւ 14 տարեկան անչափահաս 4 երեխա:
Ոսկան ՍԱՐԳՍՅԱՆ
Երբ տասնյակ անմեղ զոհեր էն լինում բանակում, ոչ ոք չի դատվում,՝ ռոբիկա-շեռժիկա- շաշիկա
բարո հայկական բանակում: Իսկ երբ երեք օրվա արձակուրդի խախտում է թույլ տվել ի հոգուտ
զինվորի, դա արդեն հանցագործություն է: