Այսօր Ավան եւ Նոր Նորք վարչական շրջանների ընդհանուր իրավասության դատարանում շարունակվեց «Հարսնաքար» ռեստորանային համալիրում անցյալ տարվա հունիսի 17-ին բռնարարքի ենթարկված ռազմական բժիշկների, բռնարարքի հետեւանքով մահացած Վահե Ավետյանի գործով հերթական դատական նիստը:
Դատարանը լսեց միայն վկա Դավիթ Հակոբյանին:
Վկա Դավիթ Հակոբյանը, որին «երգիչ Դավիթ» են ասում, հայտնեց, որ ռեստորանային համալիր միջոցառումից միջոցառում է հրավիրվում: Դեպքի օրը հրավիրվել է, քանի որ հարսանիք էր:
Նա ասաց, որ Վահե Ավետյանը ժամը 22-ի սահմաններում զանգել է եւ ասել, որ ուզում են երաժշտություն լսել: Ազատ տեղ լինելու հետ կապված նա մոտեցել է մատուցողին, ասել տեղավորելու հարց կա եւ րոպեներ անց զանգել է Վահեին ու հայտնել, որ տեղ կա: Երգիչը հիշեց, որ հանդիպել է Վահեին եւ Գարիկ Սողոմոնյանին մուտքի սրահի մոտ, ասել է՝ տեղավորվեք ու ինքը հեռացել է:
Կարդացեք նաև
Այլեւս նրանց չի մոտեցել:
Պատասխանելով հարցերին, նա նշեց, թե չի էլ իմացել, թե Վահեի հետ քանի հոգի են, քանի որ տեսել է նրանց՝ մարդկանցով շրջապատված: Նա ասաց, որ հետագայում դեպքի մասին իմացել է լրատվամիջոցներից, իսկ թե հատկապես որից՝ չի հիշում:
Ցուցմունքից հետո նրան հարցեր տվեցին ինչպես երկու մեղադրողները, տուժողի իրավահաջորդի ներկայացուցիչներ Վահե Գրիգորյանն ու Ռուբեն Եգորյանը, այնպես էլ ամբաստանյալների պաշտպանները:
Հարցաքննությունից պարզվեց, որ դեպքից 15 օր առաջ Դավիթը հրավիրել է Վահե Ավետյանին «Հարսնաքար»՝ իր շնորհակալությունը հայտնելու, քանի որ նրա հետ առնչվել էր քթի վիրահատության հետ կապված: Ինչպես ամբաստանյալների, այնպես էլ տուժողների, մասնավորապես՝ Գարիկ Սողոմոնյանի եւ Արտակ Բայադյանի հետ երգիչն ունեցել է «հավասար հարաբերություններ»:
Հարցաքննության ժամանակ երգիչը հիշեց, որ դեպքի օրը իրեն զանգել է մատուցողը եւ ասել, որ կոնֆլիկտ կա տղաների հետ: Ինքը զանգել է Վահե Ավետյանին, նա էլ ասել է, որ ամեն ինչ նորմալ է: Ինչ վերաբերում է նրան, թե տեղյա՞կ էր երգիչը, որ Վահե Ավետյանը գնացել է տուն՝ սպորտային համազգեստը փոխելու, ասաց, որ տեղյակ չի եղել եւ այդ մասին նույնպես իմացել է լրատվամիջոցներից: Ամբաստանյալ Գարիկ Մարգարյանի պաշտպան Մարինե Թովմասյանի հարցին, թե դեպքի օրը ի՞նչ հագուստով էր Վահե Ավետյանը, ոգելից խմիչք օգտագործե՞լ էր, թե՞ ոչ, նա ընդամենը հիշեց, որ Վահեն լավ տրամադրությամբ էր:
Հաջորդ վկան դատական բժիշկն էր , որին լսելուց հետո կհետազոտվի դատաբժշկական փորձաքննության եզրակացությունը:
Լրացուցիչ վկաներ դատակոչելու Մարինե Թովմասյանի միջնորդությունը հետաձգվեց. այն ոչ ժամանակին էր պատճառաբանությամբ:
Դատական հաջորդ նիստը նշանակվեց փետրվարի 11-ին:
Ռուզան ՄԻՆԱՍՅԱՆ
