«Հանգիստ ընթացող քաղաքական արշավը Հայաստանում հանկարծակի հանդիպեց տհաճ և քաղաքականապես ոչ արդարացված մի գործողության հետ, որտեղ թեկնածուի նկատմամբ տեղի է ունենում մահափորձ: Կատարվածի մասին կարող եմ ասել, որ այս ամենը անընդունելի է, քաղաքակրթության սահմաններից դուրս է, ցինիկության և գռեհկության սահմանների մեջ է, որը տեղի ունեցավ Հայաստանում»,-այս մասին այսօր «Հայելի» մամուլի ակումբում ասաց քաղաքագետ Ալեքսանդր Մարկարովը:
Նա գտնում է, որ տեղի ունեցածի վերաբերյալ չպետք է զբաղվել ենթադրություններով, քանի որ դրդապատճառները տարբեր կարող են լինել:
Բանասիրական գիտությունների թեկնածու , գրականագետ Վարդան Դևրիկյանն էլ կատարվածը որակում է իբրև հաղորդագրություն, հակառակ պարագայում Հայրիկյանն արդեն կենդանի չէր լինի.«Ամենամեծ կենսագրությունը Հայրիկյանն ուներ և չնայած, որ լուրջ ֆիգուր չէր քաղաքական դաշտում, բայց իր դեմ ոտնձգությունը անթույլատրելի էր: Ինչպես է եղել, որ մահափորձը վերջնակետին չի հասել. կամ փորձառության պակաս է եղել, կամ նպատակը սպանելը չի եղել: Հետևաբար, սա համարում եմ պարզապես հաղորդագրություն ուղղված Հայրիկյանին և ցանկանում՝ շուտափույթ ապաքինում»,-ասաց Դևրիկյանը:
Քրիստինա ՄԻՐԶՈՅԱՆ
