Համաշխարհային բանկը Հայաստանին տրամադրեց 45 միլիոն դոլար վարկ` կենսական նշանակություն ունեցող միջհամայնքային 170 կմ ճանապարհների բարելավման համար: Այս մասին այսօր լրագրողների հետ հանդիպման ժամանակ ասաց ՀԲ-ի երեւանյան գրասենյակի տնօրեն Ժան Միշել Հափին: Նրա ներկայացմամբ` 73 կմ ճանապարհն արդեն իսկ առանձնացված է եւ նախապատրաստական աշխատանքները սկսված են Արագածոտնի, Արմավիրի, Գեղարքունիքի, Կոտայքի Լոռու եւ Սյունիքի մարզերի 31 համայնքներում:
«Գյուղական վայրերում կյանքի որակի, ինչպես նաեւ արտադրողականության բարելավման առումով խիստ կարեւորվում է գյուղական բնակավայրերի կապը քաղաքային կենտրոնների եւ ընդհանրապես շուկաների հետ: 2009-ից ի վեր համաշխարհային բանկը 101,6 միլիոն դոլարից ավելի գումարներ է հատկացրել 433 կմ կենսական նշանակության ճանապարհների վերանորոգման համար: Ծրագիրը կօժանդակի նաեւ տրասնպորտի եւ կապի նախարարության քաղաքականությանը, որը ուղղված է ճանապարհային ցանցի պահպանության բարելավմանը: Հույս ունենք, որ այս ծրագրով համաշխարհային բանկը կկարողանա օժանդակել գյուղական համայնքներում աղքատության հաղթահարմանը և տնտեսության աճին»,-ասաց ՀԲ-ի երեւանյան գրասենյակի ղեկավարը, ավելացնելով, որ նախատեսվում են եւս 2 ծրագիր՝ առողջապահության եւ ոռոգման ոլորտների համար:
Նելլի ԲԱԲԱՅԱՆ
