Այսօր «Դեբատ» ակումբում հարցին, թե Պարույր Հայրիկյանի դեմ մահափորձի համար ինքն ի՞նչ վարկած ունի՝ նախագահի թեկնածու Րաֆֆի Հովհաննիսյանը պատասխանեց. «Ով ասում է, որ վարկած ունի՝ սուտ է ասում, ով ասում է, որ սա ուղղված է իշխանությունների դեմ՝ ճիշտ չի ասում: Ես վարկած չունեմ եւ չգիտեմ: Ուզում են հետաձգել, ինչո՞ւ են ուզում հետաձգել:
Ժողովուրդը պատրաստ է ունենալ նոր նախագահ փետրվարի 18-ին: Միգուցե մեկը մտահոգվում է, ես բարձրաձայն մտածում եմ՝ արդյոք մեկը ուզում է հետաձգե՞լ: Եթե ուզենար՝ կսպաներ Պարույրին: Վախեցնելով Պարույրին, ուզում էին այնպիսի գործընթաց բացել, որը թույլ կտար հետաձգում: Դուք մտածեք՝ ում էր ձեռնտու հետաձգել ընտրությունները: Ո՞վ էր վախենում»: Հարցին՝ Պարույր Հայրիկյանը այն թեկնածուն էր, որն այդքան մեծ վտա՞նգ էր ներկայացնում ընտրություններին՝ նախագահի թեկնածուն պատասխանեց. «Պարույր Հայրիկյանը պետության ակունքներում կանգնած հայրենակից է, նվիրյալ, առաջատար քաղաքացի»:
Թե ում էր, այնուամենայնիվ, ձեռնտու նման քայլ անել՝ պարոն Հովհաննիսյանն ասաց. «Ձեռնտու է նրանց, ովքեր չեն ուզում ունենալ 20 տարվա մեջ առաջին անգամ դե յուրե նախագահություն: Սա հարված է հայ ժողովրդի վրա»:
Ինքը՝ Րաֆֆի Հովհաննիսյանը քարոզարշավը շարունակելու է նույն ոգով: Այսօր Արագածոտնի գյուղերում է լինելու, վաղը՝ Սյունիք: Եթե այլ որոշում ընդունի ԿԸՀ-ն, ես կհարգեմ:
Կարդացեք նաև
Պարոն Հովհաննիսյանը նշեց, որ ինքը արդեն երկու անգամ այցելել է Պարույր Հայրիկյանին եւ էլի կայցելի. «Երեկ գիշեր, երբ լուրն իմացա, Արմենուհու հետ գնացի հիվանդանոց: Երբ հարմար պահը հասունացավ, մտանք սենյակ: Իշխանության ներկայացուցիչներ կային: Մոտեցանք Պարույրին, ես Պարույրի ձեռքը սեղմեցի: Ինքն ալ գիտակցական վիճակում էր եւ ձեռքսեղմումը փոխադարձեց եւ փառք Աստծո, որ իր կյանքին ներկա դրությամբ որեւէ վտանգ չի սպառնում: Այսօր առավոտյան էլ այցելեցի, բայց վիրահատության էր, փամփուշտն էին հանում: Իմացա, որ վիրահատությունը նորմալ է անցել: Նայեցինք իրար աչքերին, ինքն ալ բարեւ ասաց, ես էլ լուռ պատասխանեցի:
Նորից կայցելեմ»:
Հռիփսիմե ՋԵԲԵՋՅԱՆ
