Հանուն ճշմարտության պետք է ասել, որ ստեղծված վիճակից ելք է փնտրում միայն Սերժ Սարգսյանը։ Մյուսները՝ մեկը հացադուլ է անում, մյուսն էս թարս մոմենտին կոշիկ է առնում կամ վարսավիրանոցներից դուրս չի գալիս, երրորդը սպառնում է թեկնածությունը հանել, չորրորդը ԱՄՆ նախագահներից ստացած պատվոգրերն է ցույց տալիս, հինգերորդը տոկոսախեղդ ու տերմինախեղդ է անում ողջ գյուղական ինտելիգենցիային, վեցերորդը հայտարարում է, որ քարոզարշավ չի անելու, բայց մինչեւ վերջ նայելու է մարդկանց աչքերին… Չէ, ինչ ճիշտն է՝ ճիշտը, Սերժ Սարգսյանն այս ամենից ելքեր որոնում է։ Զայրանում է անհավատ ու լացկան մարդկանց վրա, երբեմն, երբ հավեսը տեղն է, հորդորում է վարունգը ճիշտ աճեցնել։ Համարյա ամեն կանգառում հայտարարում՝ այ մարդիկ, էլ ի՞նչ եք ուզում, ձեզ համար սկուտեղի վրա լավ ընտրություններ ունենալու հնարավորություն ենք բերել, ինչո՞ւ եք հակառակվում, հանգիստ ընտրեք, է՞լի։ Նրա լավատեսությունը հարյուրերորդական վայրկյանի ընթացքում փոխանցվում է բոլոր կառույցներին։ ԿԸՀ-ն, որ մինչ այս գաղտնի կառույց էր, բաց դռների օր է հայտարարել։ Ցանկացողները կարող են գնալ, իրենց աչքով տեսնել Մուկուչյանին, նույնիսկ՝ շոշափել։ Հեռուստագովազդը չե՞ք լսել։ Բայց, խոսքը մեր մեջ, այսքան բանից հետո մենք մի քիչ անշնորհակալ խալխ ենք։
Էդիկ ԱՆԴՐԵԱՍՅԱՆ
«Հրապարակ»
