«Սինջար եզդիների ազգային միավորում» հասարակական կազմակերպությունը օրեր առաջ ստացել է մի տեսանյութ, որտեղ ոմն Նարինե Խաչատրյան պատմում է, թե ինչպես են Արագածոտնի մարզի Սադոնց գյուղում հիմնադրել մանկապարտեզ՝ եզդի երեխաների համար: Նա նաեւ նշում է, որ իրենց նպատակն է ոչ միայն սոցիալական աջակցություն ցույց տալ եզդիներին, այլ նաեւ՝ հոգեւոր: Մասնավորապես՝ եզդիներին կրոնափոխ անել եւ բերել դեպի քրիստոնեություն: Դրա հետ մեկտեղ վիրավորելով՝ եզդիներին անվանել է սատանայապաշտ: Նա համոզված է, որ եզդիները «խավարի» մեջ են, եւ պետք է նրանք եզդի ժողովրդին տանեն դեպի «լույսը»: «Սինջար» կազմակերպության նախագահ Բորիս Թամոյանի խոսքերով՝ նախադպրոցական կրթությունը, ըստ համապատասխան օրենքի, պետք է լինի աշխարհիկ, սակայն այս դեպքում հասկանալի է, որ խոսքը աշխարհիկ ուսուցման մասին չէ. «Այս տեսանյութը առանց արձագանքի չի մնացել։ Օրեր առաջ ես փորձեցի կապ հաստատել Սադոնց գյուղի գյուղապետի հետ։ Նա ասաց, որ այո, կա նման մանկապարտեզ, մինչդեռ մարզպետը հերքեց այս լուրը՝ ասելով, որ նման մանկապարտեզ չկա։ Դա, համենայնդեպս՝ ինձ համար, պարզ է, թե ինչու՝ նրանք չունեն լիցենզիա եւ համապատասխան թույլտվություն: Իրենք են ներքին կարգով թույլ տվել, եւ հիմա, երբ պատմությունը ջրի երես է դուրս եկել, փորձում են կոծկել այն»,- ասաց Բորիս Թամոյանը:
Ներկայումս կազմակերպությունը դիմել է կրթության եւ գիտության նախարարություն եւ ՀՀ վարչապետին, որպեսզի այս հարցը պարզաբանվի, քանի որ եթե այդ մանկապարտեզը այսքան ժամանակ գործել է անօրինական, ըստ պարոն Թամոյանի, ոչ ոք չի ընդունի, որ նման բան է եղել: Ինչպես մեզ ներկայացրեց Բորիս Թամոյանը, այժմ էլ շարունակվում են այդ հավաքները: Հավաքները տեղում կոորդինացնում է ազգությամբ եզդի մի տղամարդ, որի անունը, պարոն Թամոյանի տվյալներով, Բորիս է: Բորիս Թամոյանը համոզված է, որ Նարինե Խաչատրյանի ներկայացրած կազմակերպության նպատակը եզդիներին իրենց ազգային արմատներից կտրելն է: Այս խնդրի կապակցությամբ, ինչպես հավաստիացրեց Բորիս Թամոյանը, իրենք իրենց պայքարը շարունակելու են:
ՍԻՐՈՒՇ ՊԵՏՐՈՍՅԱՆ
«Առավոտ» օրաթերթ
