Ազգային անվտանգության խորհրդի քարտուղար Արթուր Բաղդասարյանը երեկ մասնակցել է ՀԱՊԿ Ռազմատնտեսական համագործակցության միջպետական հանձնաժողովի նիստին, որի ժամանակ ստորագրված արձանագրության մեջ ամրագրվել են հայ-ռուսական համատեղ ձեռնարկությունների եւ սպասարկման կենտրոնների ստեղծմանն ուղղված կոնկրետ միջոցառումներ եւ քայլեր՝ ըստ ժամկետների եւ կատարողների: Նիստի ավարտին ԱԱԽ քարտուղար Արթուր Բաղդասարյանը ՀԱՊԿ գլխավոր քարտուղար Նիկոլայ Բորդյուժայի կողմից պարգեւատրվել է «Հավաքական անվտանգության պայմանագրի» մեդալով՝ ՀԱՊԿ հավաքական անվտանգության համակարգի զարգացման եւ ամրապնդման գործում մեծ ավանդի, ռազմական եւ ռազմատեխնիկական համագործակցության ամրապնդման, ՀԱՊԿ հավաքական անվտանգության խորհրդի որոշումների գործնական իրականացմանն ակտիվ մասնակցության համար:
«Առավոտ» օրաթերթ
