Ալեքսանդր Արզումանյանը՝ թեկնածուների մասին
Այսօր «Ազատ դեմոկրատներ» կուսակցության անդամ Ալեքսանդր Արզումանյանն ընդդիմադիր թեկնածուներ անվանեց Հրանտ Բագրատյանին, Րաֆֆի Հովհաննիսյանին եւ Պարույր Հայրիկյանին: Aravot.am-ը նրանից հետաքրքրվեց՝ այսինքն՝ Անդրիաս Ղուկասյանին, Վարդան Սեդրակյանին իշխանակա՞ն թեկնածուներ եք համարում: Ալեքսանդր Արզումանյանը պատասխանեց. «Անդրիաս Ղուկասյանը չի մասնակցում ընտրապայքարին: Նա իր բողոքն է հայտնում, որը ես հարգում եմ: Նա այդ որոշման իրավունքն ունի: Շատ խիզախ քայլի է դիմել: Ինչքանով է նպատակահարմար՝ ես չգիտեմ: Նա չի լինելու ընտրություններում, կոնկրետ խնդիր է առաջ քաշել: Չեմ կարծում, որ Սերժ Սարգսյանին հնարավոր է չեղյալ հայտարարել որպես թեկնածու, որ իր պայմանը կատարվի: Այլապես ես իրեն շատ հարգում եմ: Վստահ չեմ, որ նա լինելու է թեկնածուների շարքում: Էն մյուսին՝ էպոսագետին, չեմ ճանաչում»:
Պարոն Արզումանյանը խոստացել էր Հրանտ Բագրատյանի նախընտրական ծրագրի արտաքին քաղաքականության հետ կապված հատվածին ծանոթանալ եւ կարծիքը հայտնել. «Նորմալ ծրագիր է: Իմ առաջարկներն ընդունվել են, բայց, այնուամենայնիվ, բաց է մնացել Եվրամիության եւ Եվրասիական միության հարցերը»,- ասաց պարոն Արզումանյանը,- « Հանրությանը պարզ չէ՝ Բագրատյանը այնուամենայնիվ, որի՞ կողմնակիցն է: Չնայած հուսով եմ` մինչեւ ընտրությունները Բագրատյանը այդ հարցի պատասխանը կտա»:
Անդրադառնալով քարոզարշավին՝ նա ասաց, որ արտաքուստ քարոզարշավը շատ հանգիստ ու հանդարտ է ընթանում: Դեռեւս արտառոց խախտումների չի հանդիպել. «Ես կարծում եմ, որ Հայաստանի բնակչության զգալի մեծամասնությունը ընդդիմադիր է գործող իշխանություններին: Ես դեմ եմ չմասնակցությանը եւ պասիվությանը: Պետք է գնալ ընտրության եւ ձայն տալ ընդդիմադիր գործիչներին»:
Կարդացեք նաև
Չնայած «Ազատ դեմոկրատները» հայտարարություն են տարածել, որ թեկնածու չեն առաջադրում եւ ոչ մեկին չեն սատարում, բայց կուսակցության առանձին անդամներ, այդ թվում՝ Ալեքսանդր Արզումանյանը, սատարում են Հրանտ Բագրատյանին. «Ամենահոգեհարազատը, ամենաազատականը այս 3 ընդդիմադիր թեկնածուներից թերեւս Հրանտ Բագրատյանն է: Բայց, այնուամենայնիվ, կան հարցեր, որոնք ամբողջությամբ չեն համապատասխանում մեր տեսլականին: Մենք չենք կարող պատասխանատվություն կրել ամբողջական ծրագրի համար: Մենք մասնակցում ենք, եւ ես, որպես Ալեքսանդր Արզումանյան, կգնամ եւ իմ ձայնը կտամ Հրանտ Բագրատյանին»:
Հռիփսիմե ՋԵԲԵՋՅԱՆ
: Որևէ մեկի հատկանիշը գնահատելու համար հարկավոր է այդ հատկանիշի որոշ մասն ունենալ նաև իր մեջ: