Այսօր Շիրակի մարզի ընդհանուր իրավասության դատարանում շարունակվելու էր Թուրքիայի Տրապիզոն քաղաքում մարմնավաճառությամբ ու կավատությամբ զբաղված Նարինեի ու Սուսաննայի դեմ հարուցված քրեական գործի քննությունը: Հիշեցնենք, որ այս տիկնայք մեղադրվում են 31-ամյա գյումրեցի մատուցողուհի Հրանուշին Թուրքիայի Տրապիզոն քաղաքում թրաֆիքինգի զոհ դարձնելու մեջ: Սակայն դատը դարձյալ տեղի չունեցավ Սուսաննայի փաստաբանի`Մելանյա Սարգսյանի չներկայանալու պատճառով: Դեռևս անցած դատական նիստերին դատը վարող դատավոր Էդուարդ Մանուկյանը դժգոհել էր, թե նիստերի հետաձգումով պետությանը մեծ վնաս են հասցնում. արդեն իսկ 80 տոննա բենզին են ծախսել ամբաստանյալների վրա, քանի որ նրանց բերում-տանում են Աբովյանի կանանց գաղութից: Թուրքիայի Տրապիզոն քաղաքում Դոկտոր մականունով հայտնի 60-ամյա Սուսաննայի փաստաբանի չներկայանալը այսօր դարձյալ զայրացրեց դատավոր Էդուարդ Մանուկյանին: «Ես 32 տարվա դատավոր եմ, նման բան չեմ տեսել իմ պրակտիկայում, փաստաբանի պատճառով արդեն 4-րդ ամիսն է` ես պարապուրդ եմ տալիս: Այսօր նորից չի եկել, իր հիվանդ լինելու մասին էլ բժշկական փաստաթուղթ չի ներկայացրել: Եթե հաջորդ դատական նիստին` փետրվարի 5-ին էլ չեկավ, գրություն կուղարկեմ Փաստաբանների պալատին` պահանջելով նրան զրկել փաստաբան աշխատելու իրավունքից: Սա անհարգալից վերաբերմունք է դատարանի նկատմամբ» , -նեղվեց Էդուարդ Մանուկյանը:
Նունե ԱՐԵՎՇԱՏՅԱՆ
