Հայաստանի պետական ֆիլհարմոնիկ նվագախմբի (ՀՊՖՆ) 2012-2013թթ. համերգաշրջանի 2-րդ մասը մեկնարկում է փետրվարի 1-ին` «Արամ Խաչատրյան» համերգասրահում գերմանացի աշխարհահռչակ դաշնակահար Բերնդ Գլեմզերի մասնակցությամբ համերգով: Այս մասին այսօր` «Արամ Խաչատրյան» համերգասրահում լրագրողներին հայտնեց ՀՊՖՆ տնօրեն Ռուզան Սիրունյանը:
ՀՊՖն-ի գլխավոր դիրիժոր Էդուարդ Թոփչյանն ասաց, որ կայանալիք համերգին կհնչեն Շոստակովիչի 10-րդ սիմֆոնիան եւ Ռախմանինովի Դաշնամուրի 3-րդ կոնցերտը, իսկ Գլեմզերը հանդես կգա որպես մենակատար. «Ուրախ ենք, որ հանդես ենք գալու մեր կողմից սիրված մենակատարի հետ, որն աշխարհի լավագույն դաշնակահարներից է: Ինչպես հայտնի է, Ռախմանինովի Դաշնամուրի 3-րդ կոնցերտը դժվար է կատարել, բայց Գլեմզերն առավել քան լավ է նվագում: Բացի նրանից, մեզ հետ հանդես կգա նաեւ Իսպանիայից ժամանած պիկոլո ֆլեյտահարուհի Սառա Ուռենյա Կաբրերան, ով հիանալի ֆլեյտահարուհի է: Ընդհանուր առմամբ` մենք լավ պատրաստվել ենք համերգին»:
Բերնդ Գլեմզերը նշեց, որ ուրախ է հերթական անգամ Հայաստանում գտնվելու եւ հայ գործընկերների հետ համագործակցելու համար. «Հատկապես հաճելի է Էդուարդ Թոփչյանի հետ համագործակցությունը, որը ոչ միայն անձնական, այլեւ այսպես կոչված երաժշտական մակարդակի վրա գտնվող շփում է: Ընդհանուր առմամբ` հասկանում եմ, ու Հայաստանում լավ են ընդունում դասական երաժշտությունը»: Դաշնակահարը փաստեց, որ ներկայումս ունի հայ ուսանողուհի` Կոնսերվատորիայի սան Մարիաննա Ուզանկիչյանը. «Նա շատ է աշխատում ու պարապում: Ժամանակ առ ժամանակ նրան ասում եմ` գուցե ուրի՞շ բանով էլ զբաղվես, բայց նա նպատակասլաց է, ես գոհ եմ նրանից: Վերջերս էլ Մարիաննային ասացի, որ օրական 8 ժամից ավել չպարապի: Առհասարակ, կուզենայի, որ գերմանացի ուսանողները գոնե 3 ժամից ավել պարապեին: Ընդհանուր առմամբ` անկախ այն հանգամանքից, որ Գերմանիայում խորն են դասական երաժշտության ավանդույթները, երիտասարդությունը չի հաճախում դասական համերգների: Դժվարանում եմ այդ հարցում համեմատել հայ եւ գերմանացի երիտասարդների նախասիրությունները, որովհետեւ չգիտեմ` հարցը Հայաստանում ինչպես է դրված»:
Խնդրի շուրջ պարոն Թոփչյանը հավելեց, որ գերմանացի երիտասարդները հաճախ չեն կարող տոմս գտնել, առավել եւս` գնել. «Երբ Գերմանիայում հայտնի երաժիշտ է համերգ տալիս, տոմս կարելի է գնել մինիմում 30 եվրոյով, էլ չեմ ասում` 100 եւ 200 եվրո արժողությամբ տոմսերի մասին»:
Կարդացեք նաև
Ռուզան Սիրունյանը նաեւ ասաց, որ նվագախումբը ակտիվ համագործակցում է բուհերի հետ. «Ֆրանսիական, Լեզվաբանական եւ Սլավոնական համալսարանների ղեկավարությունը տվել է համաձայնություն` համերգների տոմսերը զեղչերով ձեռք բերելու եւ ուսանողությանը դասական երաժշտության համերգներին մասնակից դարձնելու համար: Դա արդեն իսկ ձեռքբերում է»:
Լուիզա ՍՈՒՔԻԱՍՅԱՆ
