Վարչապետը գտնում է, որ Նաիրա Զոհրաբյանի ու Էլինար Վարդանյանի օրենսդրական նախաձեռնությունը ժամանակավրեպ է եւ հակասահմանադրական
ԱԺ ԲՀԿ-ական պատգամավորներ Նաիրա Զոհրաբյանն ու Էլինար Վարդանյանը
օրենսդրական նախաձեռնության կարգով ՀՀ կառավարությանն առաջարկել էին ՀՀ քրեական, քրեակատարողական օրենսգրքերում եւ «Զինապարտության մասին» ՀՀ օրենքում փոփոխություններ եւ լրացումներ կատարել, ինչը, սակայն, ՀՀ կառավարության բացասական եզրակացությանն է արժանացել: Ինչպես տեղեկանում ենք կառավարության կայքէջում տեղադրված նիստի օրակարգից, Տիգրան Սարգսյանն այդ որոշումը հիմնավորում է նախագծի ժամանակավրեպ եւ հակասահմանադրական լինելով: Ըստ վարչապետի, նախագծի ընդունման դեպքում ցմահ ազատազրկման դատապարտված եւ հանցանքը կատարելու պահին դատվածություն չունեցող անձը հնարավորություն է ստանալու պատիժը կրելուց պայմանական վաղաժամկետ ազատվել 10 տարի ազատազրկում կրելուց հետո, ինչը կարճ ժամկետ է` արարքի ծանրության համեմատությամբ. «ՀՀ քրեական օրենսգրքի սանկցիաների ուսումնասիրությունից բխում է, որ ցմահ ազատազրկում պատժատեսակը սահմանվում է ծանրացնող հանգամանքներում կատարված սպանության, պետական, քաղաքական, հասարակական գործչի սպանության եւ խաղաղության դեմ ուղղված հանցագործությունների համար: Տվյալ հանցագործությունների համար, որպես կանոն, սահմանվում է պատիժ` 12-ից 20 տարի ազատազրկում կամ ցմահ ազատազրկում, իսկ պայմանական վաղաժամկետ ազատման համար 10 տարի ժամկետ սահմանելու պարագայում ստացվում է, որ նման առանձնապես ծանր հանցագործություններ կատարած անձինք կարող են պատժից ավելի շուտ ազատվել, քան տվյալ հանցագործության համար սահմանված նվազագույն ժամկետը»,-կին պատգամավորներին բացատրում է Տիգրան Սարգսյանը:
Քրեակատարողական օրենսգրքերում փոփոխությունների վերաբերյալ էլ վարչապետը նկատում է, որ ըստ նախագծի՝ ցմահ ազատազրկման դատապարտված անձը կարող է ներկայացվել պատիժը կրելուց պայմանական վաղաժամկետ ազատման` նախորդող հինգ տարիների ընթացքում տույժ չունենալու եւ ազատազրկման ոչ պակաս, քան 10 տարին փաստացի կրելու պարագայում. «Սակայն տույժ չունենալու հանգամանքն անձի դրական վարքագիծը եւ ուղղվելու փաստը հավաստող չափանիշներից միայն մեկն է: Որպես այլ չափանիշներ կարելի է նշել` հանցագործությամբ պատճառված վնասը հատուցելը, տուժողի հետ հաշտվելը, պատիժը կրելու ընթացքում ավելի բարձր կրթական մակարդակ ստանալը եւ այլն»:
Կարդացեք նաև
«Զինապարտության մասին» օրենքի նախագծի վերաբերյալ իր մերժումը վարչապետն այսպես է հիմնավորել. «Օրենքի գործող նորմը սահմանված է այն տրամաբանությամբ, որ ծանր կամ առնվազն 2 անգամ դիտավորյալ հանցագործության համար ազատազրկման վայրում 3 տարուց ոչ պակաս ժամկետով պատիժ կրած անձի կողմից բացասական բարքեր ունենալու հավանականությունը մեծ է, որի պարագայում նշված անձը զինվորական ծառայության մեջ կարող է հանդիսանալ հանցածին բարքերի կրող կամ տարածող: Այս առումով գտնում ենք, որ պատժի կրման ընթացքում անձի կողմից քրեորեն հետապնդելի այլ արարքներ չկատարելը բավարար հիմք չէ վերը նշված տրամաբանությունը բացառելու համար»:
Լուսինե ԲՈՒԴԱՂՅԱՆ
