Այսօր «Սիվիլիթաս» հիմնադրամի նախաձեռնությամբ քննարկում էր կազմակերպվել «Ազատ դեմոկրատների» անդամ Ալեքսանդր Արզումանյանի, ՀՀՇ վարչության անդամ Հովհաննես Իգիթյանի մասնակցությամբ: Նախապես հայտարարվել էր, որ մասնակցելու է նաեւ ՀՅԴ պատգամավոր Արծվիկ Մինասյանը, սակայն նա չէր եկել: Որպես հյուր քննարկմանը ներկա էր նաեւ ԲՀԿ պատգամավոր Վարդան Օսկանյանը:
Հարցին՝ 2012-ին ի՞նչ կարեւոր փոփոխություններ եղան, որ կարող եք նշել՝ Ալեքսանդր Արզումանյանը պատասխանեց. «3 համանախագահող երկրներում սպասվում էին նախագահական ընտրություններ: Ակնհատ է, որ այս տարածաշրջանային խնդիրները չէին լինելու իրենց կարեւորագույն օրակարգում: ՀՀ-ում էլ խորհրդարանական ընտրություններ էին: Այնպես որ, այս ողջ տարին ընտրություններով անցավ: Վրաստանում եղան դարակազմիկ փոփոխություններ: Եվ սպասել, որ ԼՂՀ հարցում շատ լուրջ առաջընթաց կլիներ՝ սխալ է: Ավելին, եղավ Ադրբեջանի կողմից քայլ՝ Ռամիլ Սաֆարովի արտահանձնումը: Լկտի, կարելի է ասել, որոշումը մարտահրավեր նետեց միջազգային հանրությանը: Մենք դեռեւս այդ հարվածի տակից դուրս չենք եկել: Դեռ նոր մենք փորձում ենք վերականգնել ֆորմատը: ԼՂՀ հարցում, եթե չասենք հետընթաց արձանագրվեց, ոչ մի բան չեղավ:
Անդրադառնալով հայ-թուրքական արձանագրություններին, պարոն Արզումանյանն ասաց. «Խոսք չի գնում, որ կողմերը պետք է բացեն սահմանները: Հայաստանը որեւէ սահման չի փակել, որ բացի»:
Հռիփսիմե ՋԵԲԵՋՅԱՆ
