«Դատարանին ասում ենք, պարտադիր չէ, որ ամեն անգամ արգելանքը դնեք առանց հարցի, հայցի էության մեջ խորանալու: Դեռեւս դատաքննության փուլում արգելանք դնելով գույքի վրա՝ ԴԱՀԿ-ին հնարավորություն են տալիս ազատ լրատվամիջոցի նկատմամբ որոշակի գործողություններ իրականացնել: Իսկ հիմնական գործողությունները, բնականաբար, տեխնիկայի նկատմամբ է լինելու: Այսինքն՝ սահմանափակում դնելով գույքի վրա՝ մեկ տարվա ընթացքում խմբագրությունը չի կարողանա հին գույքն օտարել, նոր գույք ձեռք բերել եւ այլն»,- այսօր ի պաշտպանություն «Ժողովուրդ» օրաթերթի կազմակերպված բողոքի երթի ժամանակ ասաց դատարանում թերթի ներկայացուցիչ Հարություն Բաղդասարյանը:
Հիշեցնենք, որ «Ժողովուրդ» օրաթերթի բողոքի աշխատակիցներն այսօր Երեւանի Կենտրոն եւ Նորք -Մարաշ վարչական շրջանների ընդհանուր իրավասության դատարանի նախագահին հանձնեցին միջնորդություն՝ օրաթերթի գույքի վրա դրված արգելանքը վերացնելու պահանջով:
«Գտնում ենք, որ, այս կտրվածքով, դատարանը պետք է հանի դրված արգելանքի միջոցը՝ վստահություն տալով, որ խմբագրության աշխատանքը չի խոչընդոտվի՝ անգամ հայցվորի պահանջը բավարարող վճիռ կայացնելու դեպքում: Իհարկե, կասկածում ենք, որ նման վճիռ կկայացվի: Բայց ուզում ենք դիմել նաեւ դատարաններին՝ տեղյակ պահելու, թույլ տվեք, որ մենք էլ ձեզ հարգենք, որովհետեւ ձեր կողմից իրականացվող գործողությունները անպայման հայցի ապահովման միջոց կիրառելու առումով այնքան էլ չի բխում օրենքից»,- հավելեց դատարանում թերթի ներկայացուցիչ պարոն Բաղդասարյանը:
Արփինե ՍԻՄՈՆՅԱՆ
