Դրանք տեղադրված են եղել 2006-2010 թվականներին` բանտերի կառուցման ընթացքում։
Վրաստանի ներքին գործերի նախարարությունը հայտնաբերել եւ առգրավել է վրացական բանտերում ապօրինի տեղադրված տեսաձայնագրիչ սարքեր։
Նախարարության խոսնակ Նինո Գիորգոբիանին այսօր լրագրողներին հայտնել է, որ դրանք հայտնաբերվել են բանտերում պահակների եւ հսկիչների կողմից կիրառված կտտանքների եւ ստորացման փաստերով գործի հետաքննության ընթացքում։
Անցյալ տարվա սեպտեմբերին համացանցում տեղադրված կալանավորների նկատմամբ դաժան վերաբերմունքի եւ նույնիսկ սեռական բնույթի զարհուրելի բռնարարքների մասին տեսագրությունները Վրաստանում առաջացրել են աննախադեպ հանրային ընդվզում, որը հանգեցրեց խորհրդարանական ընտրություններում նախագահ Միխեիլ Սաակաշվիլիի առաջնորդած Միացյալ ազգային շարժման պարտությանը։
Կարդացեք նաև
Եվ քանի որ Վրաստանի լրամշակված Սահմանադրությամբ երկրում հաստատվել է խորհրդարանական հանրապետություն, պարտության արդյունքում, փաստորեն, տեղի է ունեցել իշխանափոխություն։
Վարչապետ Բիձինա Իվանիշվիլիի ղեկավարած «Վրացական երազանք» կուսակցությունը աստիճանաբար ամրապնդում է դիրքերը եւ գործադիր բոլոր օղակներից դուրս է մղում Սաակաշվիլիի զինակիցներին։
Սկանդալային բացահայտումների կապակցությամբ պաշտոնանկ են արվել ուժային կառույցների մեծ թվով բարձրաստիճան ղեկավարներ, հարուցվել են քրեական գործեր։
Վրացի իրավապաշտպանների փոխանցմամբ, տեսագրությունները օգտագործվել են բանտարկյալներին ահաբեկելու եւ նրանցից պահանջվող վկայությունները կորզելու նպատակով։
Նինո Գիորգոբիանիի խոսքերով, տեսաձայնային ապօրինի սարքավորումներ են հայտնաբերվել Թբիլիսիի թիվ 4 եւ 9, Բաթումիի թիվ 3, Քութաիսիի թիվ 2 եւ Զուգդիդիի թիվ 4 բանտերում, ինչպես նաեւ Գեգուտիի թիվ 14 կալանավայրում։ Դրանք տեղադրվել են այդ բանտերի կառուցման կամ վերանորոգման ընթացքում։
«Այդ քրեակատարողական հիմնարկներում հետաքննության խուզարկության ընթացքում հայտնաբերել ենք հատուկ սենյակներ, որոնցում եղել են տեսաձայնագրիչ սարքավորումների հեռակառավարման համակարգիչներ եւ վահանակներ», – ասել է Նինո Գիորգոբիանին։
Հետաքննությունը շարունակվում է, գործը գտնվում է Ներքին գործերի նախարարության հակակոռուպցիոն բաժնի վարույթում։
Արմեն Քոլոյան
Ազատություն» ռադիոկայան
