Ադրբեջանական ԽՍՀ-ից փախստականների համագումարի նախագահությունն այսօր կազմակերպել էր կլոր սեղան-քննարկում`«Սաֆարովի երկիր» անվանումով: Քննարկմանը մասնակցում էին քաղաքագետներ, քաղաքական, հասարակական գործիչներ:
«Սաֆարովի գործի» ամբողջ ընթացքը բացահայտեց մի կարևոր իրողություն. Կասպից Արևմուտքում միջազգային նշանակության ինչ-ինչ խնդիրների լուծման նպատակով ձևավորվել է զանգվածային սպանության մի մեքենա, որը, համապատասխան զարգացումների պարագայում, սպառնում է իր թիրախը դարձնել հայությանը, ինչպես 1915-23թթ.-ին, այնպես էլ 88-94թթ.-ին»,- կլոր սեղան-քննարկման ընթացքում ասաց համագումարի նախագահության քարտուղար Մարիամ Ավագյանը:
Այլատյացությունը կանխարգելող նախաձեռնության անդամ Արմինե Ադիբեկյանի բնութագրմամբ՝ Ադրբեջանն այնպիսի երկիր է, որը ոտնահարում է մարդու իրավունքները, սպանում իր քաղաքացիներին, հետևաբար Հայաստանի և Ադրբեջանի մերձեցման ցանկացած գործընթացը պետք է դադարեցնել, քանի որ այն անարդյունավետ է: «Եթե ուսումնասիրենք Ադրբեջանի մանկական և ուսումնական գրականությունը, ապա կտեսնենք, որ Բաքուն մատաղ սերնդի մեջ սերմանոմ է հայատյացություն: Պետք է դադարեցնել ԼՂ բանակցային գործընթացը»,- ասաց Արմինե Ադիբեկյանը: Նա գտնում է, որ այսօր պետք է դաստիարակել այնպիսի սերունդ, որը կկարողանա լուծել խնդիրները, ավելի լավ ճանաչելով իր հակառակորդին:
Նույն համագումարի նախագահության անդամ Սուսաննա Մելիքյանն ընդգծեց, որ այսօր միջազգային որևէ կառույց չի սաստում և չի կարողանում առաջն առնել Ադրբեջանի նման քաղաքականության: Նա գտնում է, որ մշակութային արժեքների ոչնչացման և երեխաների մեջ հայատյացության վերաբերյալ, տարածաշրջանում միակ երկիրը, որը կարող է ազդել Ադրբեջանի վրա` Իրանի Իսլամական Հանրապետությունն է: «Իրանը տարածաշրջանում որոշակի դերակատարություն ունեցած, մշակութային և հոգևոր պետություն է: Ադրբեջանի կատարած գործողությունները աստվածամերժ են և հաճախ նման հարցերը հնչեցնում է Իսլամի անունից, հետևաբար Իրանը անհաղորդ մնալ չի կարող»,-ասում է նա:
Կարդացեք նաև
Մարդու իրավունքների նախկին պաշտպան Լարիսա Ալավերդյանն ասաց, որ Ադրբեջանը մինչև Սաֆարովի արտահանձնումը Հունգարիայում ակտիվ աշխատում էր. կազմակերպվում էին խայտառակ միջոցառումներ մեկը մյուսի հետևից, իսկ հայկական կողմը դրանցից միայն մեկն է կանխել: «Մենք հիմա հնարավորություն ունենք Սաֆարովից հրաշքով փրկված Հայկ Մուկուչյանի գործով գոնե դիմել ՄԱԿ, քանի որ ժամանակը քիչ է և չենք հասցնի դիմել Մարդու իրավունքների եվրոպական դատարան (ՄԻԵԴ)»,-ասաց տիկին Ալավերդյանը:
Քրիստինա ՄԻՐԶՈՅԱՆ
