«Բարձր գնահատականներ ենք լսել, հաճելի է քո կատարած աշխատանքի դիմաց նման գնահատականի արժանանալ»,-այսօր «Գարեգին Նժդեհ» ֆիլմի մասին լրագրողների հետ հանդիպման ժամանակ նշեց դերասան Վիգեն Ստեփանյանը:
Բանախոսի պնդմամբ, ֆիլմը դիտելուց հետո է անհրաժեշտ դիտողություններ անել, ունենք քաղաքային մի շերտ, որը սեփական անձը չի հարգում, ծաղրում է ու արհամարհում` սա է ամենացավալին.
«Մենք չունենք լավ դերասաններ, ցավով եմ ասում դա: Սերիալում խաղալն էլ է աշխատանք` դերասանները շենքեր չեն կառուցում, ատամ չեն բուժում, մեր կյանքը դա է` խաղալ, լինել բեմում: Արվեստի մարդկանց հետ խոսեք արվեստի լեզվով»:
Դերասանը ֆիլմում կերտում էր Նժդեհի լուրջ գաղափարական հակառակորդի կերպարը: Նրա խոսքով, երբ դիմացդ նյութ, սցենար, ռեժիսոր ու լավ խաղընկեր կա, դու պարզապես հաճույք ես ստանում:
Դերասան Շանթ Հովհաննիսյանը, ով ֆիլմում կերտում էր երիտասարդ Գարեգին Նժդեհի կերպարը, ասաց, որ ֆիլմը ստացվել է եւ ասելիքի առումով եւ իր նշանակությամբ.
«Հանդիսատեսի կարծիքը ու հույզերը, որ նկատվեցին, մեզ շատ ոգեւորեց: Մեծ պատասխանատվություն զգացի այն աշխատանքի դիմաց, որը կատարված էր: Ֆիլմի ընթացքում ավելի խորությամբ ընկալեցի այդ մարդուն, նրա գործունեությունը: Ինձ համար դա հայրենասիրության, հայրենապաշտության մեծ դաս էր»:
Պրն. Հովհաննիսյանը կարծում է, որ Գարեգին Նժդեհ անունը ազգի նկարագիրն է: Մեր պատմությունը հարուստ ու մեծ ավանդույթ ունի, կարելի է ֆիլմեր նկարել նաեւ Կոմիտասի, Մաշտոցի, Թումանյանի մասին:
Անժելա ՇԱՀՈՒՄՅԱՆ
