Այսօր Facebook սոցիալական կայքի մի խումբ օգտատերեր կենտրոնական ընտրական հանձնաժողովի առջեւ բողոքի ակցիա են անցկացրել:
Նրանք պահանջում էին հանձնաժողովի նախագահ Տիգրան Մուկուչյանի հրաժարականը:
«Պահանջում ենք պետական մարմնից` Կենտրոնական ընտրական հանձնաժողովից ազատել շենքը, պարոն Մուկուչյանը հրաժարական տա: Ժողովրդի շահը պահանջում է, որ ընտրություններում կեղծարարություն չլինի: Նրանք տարիներ շարունակ կեղծարարությամբ են զբաղվում եւ պետք է ազատեն պետական մարմինը, որովհետեւ Հայաստանը ժողովրդի, ոչ թե քրեաօլիգարխիայի երկիր է: Հանձնաժողովը տարիներ շարունակ մասնակցում է ընտրական գործընթացների կեղծարարությանը, ինչի արդյունքում ամեն օր մարդիկ սրտի կաթվածով հեռանում են>,- ասաց Արթուր Ղազարյանը:
ՌԱՀՀԿ փորձագետ Սարո Սարոյանն էլ հավելեց, որ ընտրական գործընթացները մշտապես պարալիզացվում են ու առաջիկա ընտրություններն էլ նույն բախտին են արժանանալու. «Այս պահին են արդեն ընտրական գործընթացները կեղծվում, վարչական ռեսուրսը կիրառվում է: Ռեժիմն օգտագործում է իր ամբողջ ադմինիստրատիվ ռեսուրսները՝ ընտրական հարցերը լուծելու համար»:
Կարդացեք նաև
Ցուցարարների մեջ կային նախագահի թեկնածու Անդրիաս Ղուկասյանի համակիրներ: Aravot.am-ը փորձեց ցուցարարների պահանջի վերաբերյալ պարզաբանում ստանալ հանձնաժողովից, բայց հանձնաժողովում անգամ ցույցի մասին տեղյակ չէին, խոստացան առաջիկայում պարզաբանել:
Արփինե ՍԻՄՈՆՅԱՆ
