Եվրոպայի խորհրդի խորհրդարանական վեհաժողովի անդամների մեծ մասը առաջնորդվում է ոչ թե կառույցի գաղափարներով եւ սկզբունքով, այլ անձնական շահերով: Այսօր խորհրդարանում վերլուծելով ԵԽԽՎ առաջին նստաշրջանի աշխատանքները, որոնք տեղի էին ունենում հուվարի 21-25-ը, նման եզրահանգում արեց ԵԽԽՎ հայաստանյան պատվիրակության ղեկավար Դավիթ Հարությունյանը:
Վկայակոչելով մի շարք իրողություններ, այդ թվում՝ նաեւ Ադրբեջանում քաղբանտարկյալների մասին զեկույցի առիթով ԵԽԽՎ-ում տեղի ունեցածը, պարոն Հարությունյանը կարծիք հայտնեց, որ կազմակերպությունը ներողամտաբար է վերաբերվում Ադրբեջանին առնչվող շատ հարցերի, ինչը վերջին շրջանում նկատելի է քանիցս:
Հիշեցնենք, որ Ադրբեջանի քաղբանտարկյալների հարցերով ԵԽԽՎ ներկայացուցիչ Քրիստոֆեր Շտրասերի մուտքը Ադրբեջան արգելվել է, ինչից հետո պատգամավորը ԵԽԽՎ-ում կաշառակերության դեպքերի մասին հայտարարություններ էր արել, որոնք այդպես էլ որեւէ արձագանք չգտան:
Լրագրողները Դավիթ Հարությունյանից հետաքրքրվեցին՝ նստաշրջանում որեւէ կերպ ինքը բարձրաձայնե՞լ է ԵԽԽՎ դիտորդական առաքելության հայաստանյան ընտրությունների վերաբերյալ հրապարակած զեկույցի մասով իր դժգոհությունները: Պարոն Հարությունյանը տեղեկացրեց, որ իր դժգոհությունները, որոնք, ի դեպ, բավականին կոշտ էին, ուղարկել է վեհաժողովի գլխավոր քարտուղարին եւ զեկույցը ներկայացնող խմբի անդամներին: Հարությունյանի հավաստմամբ՝ ԵԽԽՎ տարբեր մարմիններում այն դարձել է քննարկման առարկա:
Կարդացեք նաև
Նելլի ԳՐԻԳՈՐՅԱՆ
