«Եռանախագահության ի հայտ գալը բացառում է ընդդիմադիր դաշտում միասնական թեկնածուի հնարավորությունը: Իշխանության համար այդ եռանախագահությունն էլ ընդդիմության միասնական թեկնածուն է»,- այսօր «Փաստարկ» ակումբում հայտարարեց ՀՀ նախագահի թեկնածու Արման Մելիքյանը՝ նկատի ունենալով նախագահի թեկնածուներ Րաֆֆի Հովհաննիսյանի, Հրանտ Բագրատյանի եւ Պարույր Հայրիկյանի երեկվա համատեղ քայլը՝ հայտարարության տեսքով :
Եթե օրինական ընտրություններ սպասվեն, Մելիքյանը նման մտածված գիծն արդյունավետ կհամարեր, բայց հարց այն է, որ այժմ պայքարը օրինական ընտրությունների համար է:
Նախագահի թեկնածուի տպավորությամբ, այս ընտրություններում սեւ PR-ի տեխնոլոգիային փոխարինում է սպիտակ PR-ը, ինչը վնաս է այդ թեկնածուներին: Խոսքը հենց Րաֆֆի Հովհաննիսյանի, Հրանտ Բագրատյանի եւ Պարույր Հայրիկյանի նկատմամբ իշխանության «գորովալից» վերաբերմունքի մասին է: Մելիքյանը նրանց անվանեց «Սերժ Սարգսյանի կողմից գուրգուրված» թեկնածուներ:
«Մարդիկ վախեցած են, մարդիկ ընկճված են առավել, քան որեւէ այլ հայաստանյան մարզում»,- Սունիքի մարզից իր այս տպավորությունը հայտնեց Արման Մելիքյանը: Օրերս նա մի ծրագրի շրջանակներոմ Գորիսում մասնակցել է առաջիկա նախագահական ընտրություններին վերաբերվող քննարկման: Արդյունքում, թեկնածուի թիմը որոշել է «կեղծ ժողովրդավարություն խաղացող թեկնածուներին ընդառաջ չգնալ» եւ հայտարարել, որ նմանատիպ միջոցառումների կազմակերպմամբ, Սյունիքը ժողովրդավարության օազիս չի դառնում ու տպավորություն չստեղծվի, որ ազատ մտքերի փոխանակումն այստեղ սովորական գործընթաց է:
Կարդացեք նաև
Նելլի ԳՐԻԳՈՐՅԱՆ
