Երևանի Արաբկիր և Քանաքեռ-Զեյթուն վարչական շրջանների դատարանում՝ դատավոր Արմեն Խաչատրյանի նախագահությամբ հունվարի 29-ին տեղի կունենա Տիգրան Հակոբյանի դեմ գործով առաջին դատական նիստը:
«Հեռուստառադիոպետկոմ»-ի և «Արմենպրես» գործակալության նախկին նախագահ ու տնօրեն Տիգրան Հակոբյանը մեղադրվում է որպես «Ագրոհոլդինգ» ՍՊԸ-ի տնօրեն, իր լիազորություններն ընկերության շահերին հակառակ և իր օգտին օգտագործելու հետևանքով, ընկերությանը և ընկերության հիմնադիր սեփականատերեր Գոռ և Արմեն Խեչոյաններին ծանր հետևանքներ առաջացնող՝ առանձնապես խոշոր չափերի նյութական վնաս պատճառելու համար։ ՀՀ ոստիկանության քննչական գլխավոր վարչության ՀԿԳ քննության վարչությունը Տիգրան Հակոբյանին մեղադրանք է առաջադրել ՀՀ քրեական օրենսգրքի 214-րդ հոդվածի 2-րդ մասով՝ առևտրային կամ այլ կազմակերպությունների ծառայողների կողմից լիազորությունները չարաշահելը, ինչն առաջացրել է ծանր հետևանքներ:
Այսպիսով կարող ենք փաստել, որ նախաքննական մարմինը փոխել է Տիգրան Հակոբյանի գործողություններին ի սկզբանե տրված իրավական գնահատականը: Նախկինում նրան մեղադրանք էր առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ առանձնապես խոշոր չափերի` 184.224.060 ՀՀ դրամ հափշտակություն կատարելու համար, իսկ ներկայումս` 214-րդ հոդվածի երկրորդ մասով, որը նախատեսում է ավելի մեղմ պատժատեսակ:
Տ.Հակոբյանի նկատմամբ որպես խափանման միջոց է ընտրված ստորագրությունը` չհեռանալու մասին: Նա կալանքից ազատ է արձակվել քրեական գործի նախաքննության օրինականության նկատմամբ հսկողություն իրականացնող դատախազի` ՀՀ գլխավոր դատախազության կոռուպցիայի և կազմակերպված հանցագործությունների գործերով վարչության պետի տեղակալի 01.03.12թ. որոշմամբ` հաշվի առնելով Տ.Հակոբյանի վատառողջ լինելը, թվով 24 ԶԼՄ-ների ու հասարակական կազմակեպությունների ղեկավարների դիմումն՝ ուղղված ՀՀ գլխավոր դատախազին և որ նախաքննության փուլում Տ.Հակոբյանը վերականգնել է «Ագրոհոլդինգ» ՍՊ ընկերությանը պատճառված վնասից 10.000.000 մլն. դրամ գումարը` պատրաստակամություն հայտնելով ազատության մեջ գտնվելու դեպքում շարունակել գումարների վերականգնումը:
