«Օլանդն ընդունել է Հայաստանի նախագահի կողմից անցյալ տարվա նոյեմբերին ուղարկված Հայաստան 2013 թվականին այցելելու հրավերը»
«Ֆրանսիայի նախագահ Ֆրանսուա Օլանդը նախատեսում է Հայաստան այցելել ապրիլի 24-ին»:
Այս մասին հաղորդել է թուրքական «Հուրիեթ» պարբերականը, որի համաձայն Օլանդը, որը նախատեսում է Հայաստան այցելել Հայոց ցեղասպանության զոհերի հիշատակի օրը, ընդունել է Հայաստանի նախագահ Սերժ Սարգսյանի կողմից անցյալ տարվա նոյեմբերին ուղարկված՝ Հայաստան 2013 թվականին այցելելու հրավերը:
Պարբերականը, վկայակոչելով Ելիսեյան պալատի իր աղբյուրները, նշել է, թե Օլանդը նախատեսում է մինչև 2014 թվականին կայանալիք տեղական ընտրությունները «ցեղասպանությանը նվիրված համոզիչ ուղերձով» հանես գալ ֆրանսիահայ համայնքի առջև:
Կարդացեք նաև
Հիշեցնենք, որ Ֆրանսիայի Սենատն անցյալ տարվա հունվարի 23-ին քվեարկել էր Հայոց ցեղասպանության ժխտումը քրեականացնող օրինագծի օգտին:
Սենատը ձայների 127՝ կողմ, 86՝ դեմ հարաբերակցությամբ ընդունել էր օրինագիծ, որով նախատեսվում էր մինչև մեկ տարվա ազատազրկման և մոտ 59 հազար դոլարի տուգանքի ենթարկել Հայոց ցեղասպանության փաստը «հերքող կամ վիրավորական կերպով նվազեցնող» անձանց:
Ֆրանսիայի սահմանադրական դատարանը սակայն մոտ մեկ ամիս անց հակասահմանադրական էր ճանաչել այս օրինագիծը:
Ըստ «Հուրիեթ»-ի, Ֆրանսիայի նախագահը Սենատի քննարկման չի ներկայացնելու Հայոց ցեղասպանության ժխտումը քրեականացնող օրինագիծը՝ Ֆրանսիայի սահմանադրությունում առկա «տեխնիկական դժվարությունների» պատճառով:
Արմեն Հովհաննիսյան
«Ամերիկայի Ձայն»
