ԲՀԿ Շիրակի մարզային խորհրդի նախագահ, ԱԺ պատգամավոր Մարտուն Գրիգորյանը Aravot.am-ի հետ զրույցում հավաստիացրել էր, որ հավատարիմ են մնալու կուսակցության որոշմանը եւ առաջիկա նախագահական ընրություններում որեւէ թեկնածուի օգտին չեն աշխատելու: Սակայն ավելի ուշ «Առաջին լրատվական»-ին տված հարցազրույցում Մարտուն Գրիգորյանը ասել էր. «Ես անձամբ որպես ընտրող, հաշվի առնելով Գյումրի քաղաքի հետ կապված երկրի նախագահի խոստումը, ընտրելու եմ Սերժ Սարգսյանին»:
Aravot.am-ը փորձեց կապ հաստատել Մարտուն Գրիգորյանի հետ՝ պարզելու, թե ի վերջո ո՞րն է նրա դիրքորոշումը, քանի որ նրա երկու հայտարարությունները հակասում են միմյանց: Մեզ չհաջողվեց նրա հետ կապ հաստատել, օգնականն էլ տեղեկացրեց, թե տոնական օր է, և պատգամավորը գրասենյակ չի եկել:
Փոխարենը նրա օգնականը մեզ հետ զրույցում նշեց, որ «ձայն տալն» ու «սատարելը» այլ բաներ են ու մանրամասնեց. «Ես մեծ տարբերություն եմ տեսնում ձայն տալու և սատարելու միջև: Սատարել նշանակում է կազմակերպել, նշանակում է շուրջբոլորին հորդորել, ասել, որ ընտրեն տվյալ թեկնածուին: Սակայն այդպես չէ: Մարտուն Գրիգորյանն ասել է, որ մեկ ձայն ունի և այն տալու է Սերժ Սարգսյանին: Ես այդպես եմ հասկացել, առանձին քննարկումներ էլ չեն եղել»:
Տաթև ՀԱՐՈԻԹՅՈՒՆՅԱՆ
