Շիրակցիները Սուրբ Սարգիսին երկրպագեցին ճոխ սեղաններով, բեմադրություններով, համերգներով ու խարույկով
Այսօր Շիրակի մարզային ու քաղաքային իշխանությունների ֆինանսավորմամբ «Մայր Հայաստան» հուշահամալիրում կազմակերպվել էր Գյումրու ձմեռն ու Սուրբ Սարգիսի տոնը: Հատկապես մեծ պատրաստություն էին տեսել Շիրակի մարզի դպրոցների տնօրենները, որոնք մրցակցության մեջ էին թե Սուրբ Սարգսի պատվին գցած սեղանների ճոխությամբ, թե բեմադրություններով, գեղանկարների ցուցադրությամբ: Վերջիններս ջանք ու եռանդ չէին խնայել «Մայր Հայաստան» հուշահամալիրում Գյումրվա կոլորիտը ստեղծելու. մի կողմից լարախաղացն էր իր մոտ հրավիրում, մյուս կողմում` բեղերով , թասիբով գյումրեցու կերպարի մեջ մտած դպրոցահասակներն էին սեղան նստում, կենաց ասում ու Սուրբ Սարգիսից իրենց քաղաքի համար սեր ու բերեկեցություն խնդրում, անգամ «շաբաշ» էին տալիս Սրբի պատվին:
Մի խոսքով , այսօր Շիրակի մարզի ազգաբնակչության մեծ մասը «Մայր Հայաստան»-ում էր: Ներկա էին մարզպետարանի բոլոր պաշտոնյաները, Գյումրու քաղաքային իշխանությունը`իր ամբողջ անձնակազմով և Շիրակի հոգևոր թեմի առաջնորդ Միքայել եպիսկոպոս Աջապահյանը, որի Սուրբ Սարգիսին նվիրված ինքնատիպ ելույթին հաջորդեց ձիավորների մուտքը հուշահամալիր:
Շիրակի մարզպետարանի կրթության վարչության պետ Սահակ Մինասյանի մոտավոր հաշվարկներով, մոտ 10 հազար մարդ էր մասնակցում այս միջոցառմանը: «Այսօր ամեն ինչ արվել է, որ լիարժեք հանգիստ և տոնակատարություն ստացվի. տարբեր ձմեռային խաղեր են կազմակերպված, տարբեր պայքարային ձմեռային մարզաձևեր, երեխաների ձնագունդ, տարբեր զվարճանքներ: Միջոցառումը կազմակերպվել է մարզպետարանի ու քաղաքապետարանի անմիջական ֆինանսավորմամբ, պետական բյուջեից միջոցներ հատկացված են Սուրբ Սարգիս տոնակատարաության համար»,-ասաց կրթության վարչության պետը: Նա նաև տեղեկացրեց, որ նախատեսված են մրցույթներ «Լավագույն բլիթներ Սուրբ Սարգսի նալի հետքով», «Լավագույն սեղան», պարանի ձգում, շախմատ: Ըստ Սահակ Մինասյանի, Շիրակի ձմեռը կտոնվի փետրվարի 9-ին Գյումրի-Աշոցք ճանապարհին, իսկ ավելի կոնկրետ Թորոս գյուղում: Ըստ մեր տեղեկությունների, այդ օր ամենայն հավանականությամբ, կմասնակցի նաև երկրի նախագահ Սերժ Սարգսյանը, ով կգա Շիրակի մարզ`քարոզի:
Սահակ Մինասյանի ներկայացմամբ, այդ օրը ևս նախատեսված են զանգվածային միջոցառումներ, տոնախմբություն, որին կմասնակցեն հյուսիսային շրջանի գյուղական համայնքի բնակիչներն ու պրոֆեսիոնալ սպորտսմենները, քանի որ տեղանքը հատուկ ընտրված է ձմեռային մարզաձևերի համար: Նշենք, որ այսօր որոշ դպրոցների տնօրեններ առիթը բաց չէի թողել Սուրբ Սարգիսի տոնը քաղաքականացնելու, քանի որ մեծ թվով ծնողներ ևս մասնակցում էին այս տոնախմբությանը, վրաններից մեկի վրա խփել էին Սերժ Սարգսյանի կարգախոսը`« Դեպի ապահով Հայաստան», իսկ նրանք, ովքեր խուսափել էին իրենց սեղանի մոտ քաղաքական քարոզ հնչեցնելու, քարոզի ավելի խորամանկ ձև էին գտել. նախագահի կարգախոսը դրել էին Սուրբ Սարգիսի ցանկությունների բացիկների մեջ: Բացելով ` ընթերցում էիր `« Դեպի ապահով Հայաստան»: Իհարկե, ոչ բոլոր դպրոցների տնօրեններն էին քարոզի մեջ մտել, այսպես վարվել էին մեկ-երկու թունդ Հանրապետակններ, որոնք առիթը բաց չէին թողել Սուրբ Սարգսի հետ համատեղ իրենց կուսակցության առաջնորդին մեծարելու:
Նունե ԱՐԵՎՇԱՏՅԱՆ
