«Ազգային տոները արմատավորում են մեր դիմագիծը`այն ազգը ով չունի ավանդույթ կործանվում եւ ոչնչանում է»,-այսօր լրագրողների հետ հանդիպման ժամանակ ազգային տոների կարեւորության մասին նշեց Տեր Կարապետ քահանա Կարապետյանը:
Նրա պնդմամբ, հետամուտ լինելով մենք ապահովում ենք վաղվա կացությունը: Հոգեւորը, ազգայինը հային հայ են պահում.
«Այսօր Սուրբ Սարգիս անունը կրող բոլոր եկեղեցիներում մատուցվում է պատարագ եւ երիտասարդների օրհնություն: Օրվա խորհուրդը սերն է, մենք 365 օր պարտավոր ենք սիրել իրար: Սուրբ Սարգիսը մեր հոգին պետք է լցնի սիրով : Ազգային տոնը ոգեւորությամբ ու միջոցառումներով լեցուն է լինելու»:
Քահանայի խոսքով այսօր սիրո պակաս կա, դրա դրսեւորումը նվազել է: Ավանդույթները մեր մեջ անհրաժեշտ է պահպանել, իսկ օտարամոլությունը պետք է վանվի.
«Վալենտինը չի կարող լինել մերը`դա սխալ է: Ես դա տոն չեմ համարում, այն կոմերցիոն նպատակով է ներմուծված: Շինծու տոներից հեռու պետք է մնանք»:
Բանախոսի համոզմամբ, ամեն օրը կարելի է սիրո տոն դարձնել`ժպտալով, բարեւելով: Դրանով եկեղեցին էլ է երիտասարդանում: Մենք ազգային դիմագիծը պահպանելու համար պետք է քարոզենք ավանդույթը, այն ներմուծենք երիտասարդի սրտում, որ վաղվա օրը հիմնված լինի ազգայինի վրա:
Անժելա ՇԱՀՈՒՄՅԱՆ
