ԱԺ ՀՀԿ խմբակցության քարտուղար Հովհաննես Սահակյանը հացադուլի դուրս եկած նախագահի թեկնածու Անդրիաս Ղուկասյանին խորհուրդ է տալիս ներկայացնել իրատեսական ու հստակ ձեւակերպված պահանջներ:
«Հացադուլը որպես պայքարի միջոց՝ խոսքը հասանելի դարձնելու առումով, ընդունում եմ, բայց պետք է պահանջն ու խնդիրը ձեւակերպել հստակ, այլ ոչ թե սենսացիոն հայտարարության տակ այլ խնդիրներ առաջ քաշել՝ մինչեւ ՀՀԿ թեկնածուն չհանի թեկնածությունը, ես հացադուլի եմ: Կարող է նաեւ այլ անձինք հացադուլ անեն ու նշեն, որ Անդրիաս Ղուկասյանը պետք է սանրվածքը փոխի, այլապես իրենք հացադուլը չեն դադարեցնելու»,- Aravot.am-ին ասաց պարոն Սահակյանը:
Ըստ նրա. « Մեր երկրում այսօր այնպիսի իրավիճակ է, որ քաղաքացիական հասարակություն կոչվածը, քաղաքական դեմքերը կարող են ազատ խոսել ու իրենց ձայնը լսելի է առանց խտրականության: Մնացածը ճաշակի հարց է, մնում է հետեւել, թե էլ ինչ կարող է լինել»:
Հիշեցնենք, որ նախագահի թեկնածու Անդրիաս Ղուկասյանը չի ճանաչում ընտրությունների օրինականությունը եւ գտնում է, որ պետք է վերջ տալ ռեժիմի կողմից հասարակության վզին փաթաթած ֆարսին: Նա պահանջում է, որ ՀՀԿ թեկնածուն չմասնակցի ընտրություններին, ինչը միակ նախապայմանն է մրցակցային ընտրությունների:
Կարդացեք նաև
Պարոն Սահակյանը, անդրադառնալով միջազգային դիտորդներից Ղուկասյանի պահանջին՝ լքել Հայաստանը, քանի որ նրանց մասնակցությունը ընտրություններին չի կարող կառուցողական բնույթ ունենալ, ասաց. « Խորհրդարանական ընտրությունները ցույց տվեցին, որ գնում ենք առավել թափանցիկ, օրինակելի ընտրությունների, եւ հիմք չկա նման հայտարարություն անելու: Դա ընդամենը սեփական անձը PR անելու լավագույն միջոցն է, եւ կարծում եմ, ինչ-որ երկու օրվա ընթացքում բարձրանալ ու որոշել նախագահի թեկնածություն դնել, հետո հացադուլ անել, դրանով ոչ պայքարի ձեւն է փոխվում, ոչ էլ խոսքն է հասանելի դարձնում: Պետք է մի փոքր մեր գորոծողությունները գնահատենք, նոր քայլեր անենք: Մենք բարեխիղճ ենք եղել մեր գործողությունների, քայլերի եւ ծրագրերը իրականացնելու մեջ եւ ունենք հեղինակություն, ժողովուրդը մեզ վստահում է եւ դա ոչ Անդրիաս Ղուկասյանը, ոչ էլ մյուսներն են մեզ նվեր տվել»:
Արփինե ՍԻՄՈՆՅԱՆ
