ՀՀ նախագահի թեկնածու Հրանտ Բագրատյանը հունվարի 25-ին նախընտրական հանդիպումներ ունեցավ Իջեւանի տարածաշրջանում: Ավելի քան 4500 բնակիչ ունեցող Աչաջուր գյուղում հանդիպմանը մասնակցում էին մի քանի տասնյակ մարդ: Նրանք սկզբում մի տեսակ հեռու էին կանգնած,մինչեւ որ Բագրատյանը հորդորեց . «Մի վախեցեք, մոտեցեք, պատասխան եմ տալիս»:
Աչաջրի բնակիչներից մեկը «Առավոտի» թղթակցին հայտնեց, որ գյուղում վախի մթնոլորտ կա: Հանդիպման ժամանակ Աչաջրի կենտրոնով անցնող ավտոմեքենայից բարձրաձայն ինչ-որ բան գոռացին, հետո մեկ այլ մեքենա ճռռացնելով սուրաց գյուղի կենտրոնով, կարծես թե մրցավազքի էր մասնակցում:
Հ. Բագրատյանն ասաց, որ հեռուստատեսությամբ ասում են, թե մրցակցություն չկա: Նրա խոսքերով` մրցակցություն կա, Սերժ Սարգսյանը վերընտրվելու գործում խնդիրներ է ունենալու: Բագրատյանն ասաց, որ 15 տարի առաջ ներկաներից շատերն իրեն հայհոյել են սեփականաշնորհված հողի համար, սակայն եթե մարդիկ այս ընթացքում ինչ-որ օգուտ են ունեցել, դա հողից են ստացել: Նախագահի թեկնածուն հայտարարեց, որ չի եկել օգնելու, այլ եկել է ռեֆորմները շարունակելու , մարդկանց հնարավորություններն ընդլայնելու:
Նա ասաց, որ 5 տարվա ընթացքում Հայաստանը դրսում ապրող մեր հայրենակիցներից 11 միլիարդ դոլար է ստացել: Կետրոնական բանկը հավաքում է այդ փողերը բանկերից, փոխանակման կետերից, եւ այդ գործընթացը թույլ կտա ստեղծել փոքր բիզնեսը ֆինանսավորելու հիմնադրամ: Բագրատյանն ասաց, որ իրենք 3 տեսակի պրոգրեսիվ հարկ են մտցրելու` եկամտահարկ եւ շահութահարկ, որոնք այժմ պրոգրեսիվ հարկատեսակներ չեն եւ շրջանառության հարկ, գյուղացիները միայն հողի հարկ են վճարելու, որը ստաժ է համարվելու:
Կարդացեք նաև
Նախագահի թեկնածուի վստահեցմամբ` խոշոր բիզնեսի համար ավելի մեծ հարկ է սահմանվելու, այդ կերպ պակասեցվելու է հարուստների եւ աղքատների ունեցվածքների տարբերությունը: Հ. Բագրատյանը հայտարարեց,, որ գյուղերում կստեղծվեն փոխօգնության կոոպերացիաներ: Նա ասաց. «Ո՞վ է տեսել, որ աղքատ պետությունը կարողանա օգնի,աղքատ պետությունը պետք է մարդկանց աշխատելու հնարավորություններ ընձեռի,ցանկացած փոքր բիզնեսի վարկի 60 տոկոսը պետությունը կտրամադրի»:
Նրա խոսքերով՝ Կենտրոնական բանկը եւ բանկային համակարգը «մարդկանց հերն անիծել են», որ եղել է տնտեսական ճգնաժամ, երաշտ, սակայն պետությունը բանկերին չի ասել,որ դրանք տրված վարկերի ռիսկերը կիսեն: Նախագահի թեկնածուն հայտարարեց. «Իշխանության ուժը մենակ մեզ վրա է պատում, որ մեզ հալածի, կրակի մեզ վրա: Այս անգամ չի լինելու, չի կարա, խեղճն է ընկած» (խեղճացած է-Ո.Ս):
Հ. Բագրատյանը պատասխանեց ներկաների հարցերին, որոնք վերաբերում էին խորհրդային ավանդների վերադարձին: Նույն օրը նա ընտրողների հետ հանդիպում ունեցավ նաեւ Իջեւանում, քաղաքային շուկայի հարեւանությամբ:
Ոսկան ՍԱՐԳՍՅԱՆ
