Գուրգեն Մալխասյանը նախորդների վարչարարությունը անբավարար է գնահատում
Aravot.am-ի հետ զրույցում Գյումրու նախկին քաղաքապետ Վարդան Ղուկասյանի գլխավորած կառույցի վարչարարությունը այսպիսի խիստ գնահատականի արժանացրեց մասնագիտությամբ իրավաբան Գուրգեն Մալխասյանը, ով փոխքաղաքապետի պաշտոնից զատ միաժամանակ զբաղեցնում է թիվ 35 ընտրատարածքային ընտրական հանձնաժողովի նախագահի պաշտոնը: Իսկ քննադատության համար առիթ դարձավ այն, որ մենք փոխքաղաքապետից հետաքրքրվեցինք, թե մայրաքաղաքում այդքան լուրջ պաշտոններ զբաղեցրած անձը ինչո՞ւ է վերադարձել Գյումրի ու համաձայնել Սամվել Բալասանյանի տեղակալ աշխատելուն: Գուրգեն Մալխասյանի թվարկելով՝ ինքն աշխատել է Քաղաքացիական ծառայության խորհրդի առաջին իրավաբանական վարչության պետ` ստեղծման օրվանից, Աշխատանքի և սոցիալական հարցերի նախարարության աշխատանքի պետական տեսչության իրավական վերահսկողության բաժնի պետ, նույն կառույցում զբաղեցրել է նաև պետի տեղակալի պաշտոնը, աշխատել է ԱԺ-ում որպես փոխնախագահի աշխատակազմի իրավական բլոկի ղեկավար, Փաստաբանների պալատի անդամ է: Նշենք նաև, որ պարոն Մալխասյանը Գյումրու երկարամյա դատավորներից մեկի` Հովհաննես Մալխասյանի որդին է:
«Իմ քաղաքը շատ եմ սիրում և ուզում եմ իմ քաղաքի համար անել այն, ինչ ձեռք եմ բերել իմ երկարամյա աշխատանքային փորձի ընթացքում: Ու էսօր էդ փաստը տեսանելի է, ես ունեմ վարչարարության շատ մեծ փորձ, էսօր վարչարարությունը արդեն կայանում է մարմնում, որտեղ վարչարարությունը հավասար է եղել զրոյի: Ոչ մի վարչական ակտ նորմալ ընթացակարգով չի ընդունվել, ոչ մի վարչական ակտ «Վարչարարության հիմունքների և վարչական վարույթի մասին» օրենքով սահմանված կարգով չի ընդունվել, նորմատիվ իրավական ակտերը երբևէ փորձաքննության չեն ուղարկվել և երբևէ պետական գրանցում, հրապարակում չեն ունեցել: Մենք էսօր առավելագույնս էդ ամեն ինչը հասցրել ենք իրենց նպատակին, և էն , ինչ որ ես ձեռք եմ բերել, իրացնում եմ գիտելիքների առումով իմ քաղաքի բարօրության համար, հանուն նրա , որ մեր վաղվա սերունդը ունենա լավ քաղաք: Մենք հավատում ենք մեր քաղաքապետի գաղափարախոսությանը, մենք նրա կողքին ենք և անելու ենք այն ամենը, որ ավելորդ հերյուրանքները անգամ չկարողանան խոչընդոտ հանդիսանալ էն նախընտրական ծրագրին, որի հեղինակը պարոն Բալասանյանն է, իսկ մենք ջատագովները», -ասաց Գուրգեն Մալխասյանը:
Մենք նրան նաև հարցրեցինք, թե նախընտրական այս թեժ ժամանակահատվածում ընտրարածքային ընտրական հանձնաժողովի նախագահ լինելը չի՞ խանգարում փոխքաղաքապետ աշխատելուն: «Բացարձակապես չի խանգարում, որովհետև ընտրատարածքային ընտրական հանձնաժողովի աշխատանքը ինքնին կազմակերպչական առումով որոշակի օրեր է նախատեսում, այսինքն մի քանի օր` մեկ այս ինչը հաստատելու համար, մեկ` մյուսը: Ընդամենը վերջին մեկ օրն է, որ ամբողջապես դու պետք է տեղում լինես, իսկ դա որևէ կերպ չի անդրադառնում, չի խոչընդոտում: Որևէ իրավական խոչընդոտ նույնպես չկա համատեղելու հետ կապված, ավելին ասեմ, դա գործնական առումով ավելի օգտակար է, քանի որ համայնքն է հոգում ընտրատարածքի շատ հարցեր, գործնական պրակտիկ աջակցությունը ավելի առարկայական է: Բացի դրանից, ես Ազգային ժողովում, երբ որ աշխատում էի, ներգրավված եմ եղել աշխատանքային խմբում, որը աշխատել է «Ընտրական օրենսգրքի» նախագծի վրա և էսօր պրակտիկ իրացնելը և հետագայում, եթե անգամ փոփոխությունների հարց առաջանա, առաջարկություններ ներկայացնելը էդ առումով նույնպես արդարացված է: Բացի դա, էսօր մեր ընտրական պրոցեսները ենթադրում են նաև վարչարարություն, իսկ ես, ինչպես նշեցի, ունեմ վարչարարության մեծ փորձ, և դա ընտրատարածքային ընտրական հանձնաժողովի համար շատ անհրաժեշտ հանգամանք է, որ դիմումները, բողոքները ճիշտ ընթացակարգով քննվեն», -պարզաբանեց փոխքաղաքապետը:
Կարդացեք նաև
Նունե ԱՐԵՎՇԱՏՅԱՆ
