Թիվ 1 ընտրատարածքում անցյալ տարվա դեկտեմբերի 2-ին տեղի ունեցած ԱԺ մեծամասնական ընտրակարգով լրացուցիչ ընտրությունների կապակցությամբ «Ժառանգություն» կուսակցության թեկնածու Ստյոպա Սաֆարյանի դիմումը գրավոր ընթացակարգով այսօր քննության էր դրվել Սահմանադրական դատարանի խորհրդակցական սենյակում:
ՍԴ-ն ժ.11.20-ից մտել էր խորհրդակցական սենյակ:
Թեկնածուն պահանջել էր անվավեր ճանաչել թիվ 1 ընտրատարածքում ԱԺ մեծամասնական ընտրակարգով պատգամավոր ընտրվելու մասին թիվ 1 ընտրատարածքային ընտրական հանձնաժողովի դեկտեմբերի 7-ի թիվ 12-Ա որոշումը: Համաձայն այդ որոշման, պատգամավոր էր ընտրվել Երեւանի քաղաքապետի ազգականը՝ Հանրապետական կուսակցության անդամ Ռոբերտ Սարգսյանը:
Ստյոպա Սաֆարյանը դատարան էր ներկայացրել 25 համակարգչային էջից բաղկացած դիմում, ուր նշվել էին զանգվածային խախտումների, ընտրությունների կազմակերպման, նախընտրական քարոզչության ընթացքում կատարված օրինախախտումների մասին:
Կարդացեք նաև
Ժամը 16.30-ին դուրս գալով խորհրդակացական սենակից՝ Սահմանադրական դատարանը որոշեց մերժել Ստյոպա Սաֆարյանի դիմումը եւ թիվ 1 ԸԸՀ-ի որոշումը թողնել անփոփոխ:
Ստյոպա Սաֆարյանն այս դատական ակտը կվիճարկի Մարդու իրավունքների եվրոպական դատարանում:
