Վերլուծելով նախագահի թեկնածուների նախընտրական ծրագրերը, Հայաստանի գործատուների միության նախագահ Գագիկ Մակարյանն առանձնացրել է 3 թեկնածուներինը` Սերժ Սարգսյանինը, Հրանտ Բագրատյանինը եւ Րաֆֆի Հովհաննիսյանինը, քանի որ հենց նրանք են հրապարակել իրենց ծրագրերը: Այսօր «Սլաք» ակումբում ներկայացնելով 3 թեկնածուների ծրագրերի վերաբերյալ իր դիտարկումները՝ պարոն Մակարյանն ասաց, որ Սերժ Սարգսյանի ծրագիրը հայեցակարգային է, ռազմավարական, իսկ Րաֆֆի Հովհաննիսյանի ծրագրում կա եւ հայեցակարգ եւ գործողությունների շարք:
Ինչ վերաբերում է Հրանտ Բագրատյանի ծրագրին, ապա միության նախագահի ներկայացմամբ` այն կարդալուց անմիջապես զգացվում է, որ վարչապետի մտածելակերպով գրած ծրագիր է. այն գրված է իրեն հատուկ ոճով` էմոցիոնալ եւ հախուռն: «Պարոն Բագրատյանը,
հիմնականում կանգ է առել տնտեսական խնդիրների վրա եւ տեղոււմ կոնկրետ ժամկետներ նշելով լուծումներ է առաջարկում: Ծրագիրը բավականին հետաքրքրիր է կառուցվածքով եւ բավականին լայն տեղ ունեն սոցիալական մասը, տնտեսության զարգացման կետերը, հարկային արտոնությունները, սոցիալական արդարությունը,կոռուպցիայի դեմ պայքարի մասին առաջարկությունները, բայց համարյա թե չկա մշակույթին վերաբերող բաժին»-նշեց պարոն Մակարյանը:
Իսկ Րաֆֆի Հովհաննիսյանի առաջարկած ծրագրում խնդիրները տարանջատված են, ըստ Գագիկ Մակարյանի, եւ հստակ ներկայացվում է գործողությունների շարք:
Կարդացեք նաև
Aravot.am-ի այն հարցին, թե որ թեկնածուի ծրագիրն է ավելի իրատեսական եւ արդյոք կան նմանություններ, պարոն Մակարյանն ասաց, որ 3-ինն էլ իրատեսական են, սակայն խնդիրների լուծման առումով թեկնածուների նշված ժամանակահատվածներն են տարբերվում. «Նմանություններ կան տեխնոպարկերի, լաբորատորիաների, տնտեսության ինովացիոն զարգացումների առումով, նույն տեսակի մտքեր են նշել: Շատ տարբեր են կոռուպցիայի նկատմամբ իրենց դրսեւորումները: Սերժ Սարգսյանի մոտ հայեցակարգային մոտեցումով է, իսկ մյուս 2-ի մոտ մոտ` ասենք օրենքներում հոդվածներ փոխելով, կամ երկրում հավասար մրցակցության եւ այլ մեխանիզմներով»:
Պարոն Մակարյանի դիտարկմամբ, այս 3 թեկնածուների ծրագրերը վերացական չեն, եւ կարող են գործել, սակայն ըստ միության նախագահի.«Ճիշտ կլինի, եթե Սերժ Սարգսյանը հաղթի, օգտագործի մյուսների առաջարկները»:
Մեր այն հարցին էլ, արդյոք պարոն Բագրատյանի վարչապետության տարիների` ժողովրդի մեջ արմատացած վատ հիշողությունները նրան չե՞ն խանգարի, պարոն Մակարյանն ասաց. «Երբ հայրենական պատերազմ էր, խորհրդային միությունը հզոր պետություն լինելով` ի՞նչ վիճակում էր, քաղաքներում շան միս էին ուտում, սով էր: Պատերազմող երկիրը, որը հաղթանակով է դուրս եկել եւ նրա կառավարման շրջանում էական ռեֆորմներ են կատարվել, ես գտնում եմ, որ չպիտի այլ կերպ մեկնաբանվի: Նույնիսկ, եթե այլ կուսակցություններից, ասենք ՀՀԿ-ից նման մոտեցումներ արտահայտվեն, իրենք պետք է հիշեն, որ նույն ժամանակաշրջանում Սերժ Սարգսյանն այդ թիմի մեջ էր եւ միասին պայքարում էին այդ նպատակների համար, միասին են եկել, իրար վրա գցելու խնդիր չունեն»:
Նելլի ԲԱԲԱՅԱՆ
Ավելի լավ է՝, թող հիշեն անցած հինգ տարիները: