Հայաստանի 2012 թվականի 10 լավագույն մարզիկների ընտրության շուրջ կրքերն ըստ երեւույթին որոշ շրջանակներում դեռ չեն հանդարտվել:
Այդ նպատակով այսօր ՀՀ սպորտի եւ երիտասարդության հարցերի նախարար Հրաչյա Ռոստոմյանը հանդիպեց Հայաստանի մարզական լրագրողների ֆեդերացիայի (ՀՄԼՖ) անդամների եւ մարզական լրագրողների հետ` եւս մեկ անգամ քննարկելու քվեարկության եւ հաշվարկների կարգը եւ վերջակետ դնելու խնդրին: Տեղեկություններ կային, որ քննարկմանը պետք է հրավիրված լիներ նաեւ ԱԺ պատգամավոր Սամվել Ֆարմանյանը, որը, ինչպես նշում են լրագրողները, կասկածի տակ է առնում հավակնորդ մարզիկների ընտրության չափորոշիչները, քվեարկության արդարությունը եւ թափանցիկությունը:
Մինչեւ քննարկումն սկսվելը Aravot.am-ը հետաքրքրվեց, թե, արդյոք, պարոն Ֆարմանյանը հրավիրվե՞լ է, որին նախարարը պատասխանեց, թե Սամվել Ֆարմանյանին բջջային հեռախոսով անձամբ հրավիրել է փոխնախարար Արսեն Քարամյանը, իսկ թե ինչո՞ւ պատգամավորը չի եկել, ոչինչ ասել չի կարող:
Աշոտ ՀԱԿՈԲՅԱՆ
