Մարդու իրավունքներ, ժողովրդավարություն, արտաքին քաղաքականություն, ազգային արժեքային համակարգ. սրանք են ԱԻՄ առաջնորդ Պարույր Հայրիկյանի նախընտրական ծրագրի ուղղությունները:
«Եթե Հայաստանը հարգի միջազգային պարտավորություններով ընդունված օրենքները, ապա մարդու իրավունքների հարցերում խնդիրներ չենք ունենա: Բացակայում է քաղաքական կամքը, որովհետեւ օրենքներն ու միջազգային պարտավորություններն ունենք: Բայց դրանով հանդերձ չենք կարողանում անցնել եվրոպական մակարդակի»,- այսօր «Փաստարկ» ակումբում իր ծրագրի մարդու իրավունքների դրույթները համառոտ ներկայացրեց պարոն Հայրիկյանը:
Նախագահ դառնալու դեպքում, պարոն Հայրիկյանն ասաց, որ անմիջապես աշխատանքներ է սկսելու բոլոր քաղաքական ուժերի հետ ՀՀ Սահմանադրության բարեփոխումների հարցում.«Մի քանի ամսից մեկ տարվա ընթացքում կիրականացվի Սահմանադրության բարեփոխման հանրաքվե: Դրան կհաջորդի ընտրական օրենսգրքի համապատասխանեցումը բարեփոխված Սահմանադրությանը: Ըստ այդ դրույթների հիման վրա Ազգային ժողովը կդադարեցնի իր գործունեությունը, կկազմակերպվեն ազգային ժողովի եւ վարչապետի նոր ընտրություններ, որից հետո հրաժարական կտա նաեւ նախագահը»:
Պարոն Հայրիկյանը նախատեսել է նաեւ Սահմանադրության մեջ ամրագրել ընտրողների ձայների 10 տոկոսի ստորագրությամբ հանրաքվե կազմակերպելու իրավունքը, Ազգային ժողովի պատգամավորների թիվը 81-ի հասցնելը, ԱԺ ընտրությունները 2-3 տարին մեկ կազմակերպելն ու տեղական ինքնակառավարման մարմինների ընտրությունների հաճախականությունը մեծացնելը: Պարոն Հայրիկյանի գնահատմամբ, իր այս նախաձեռնությունը կնպաստի Հայաստանի ժողովրդավարական երկիր դառնալուն. «Հայաստանը կդառնա աշխարհի ամենաժողովրդավարական երկիրը, կբարձրանա միջազգային վարկը: Ես պետք է վերջ տամ ռոբինհուդյան մտածելակերպին, որ հարուստներից հավաքում ենք տալիս ենք աղքատներին:
Հարստահարված հարուստները ումի՞ց պետք է հետո հավաքեն իրենցից վերցված գումարները»:
Նա նաեւ վստահ է, որ ընտրությունների 2-րդ փուլ չի լինի, եթե որոշ ընդդիմադիր թեկնածուներ միասնական ճակատով հանդես գան ու կապ չունի, թե ում շուրջ կհամախմբվեն:
Նա նաեւ ասաց, որ իրենց հարցումների համաձայն, մինչեւ քարոզարշավը ցածր վարկանիշ է ունեցել.«Որովհետեւ մարդիկ չգիտեին՝ մասնակցելու եմ ՝ թե ոչ: Հիմա իրավիճակն այլ է, հիմնական թեկնածուներից մեկն եմ»:
Պարոն Հայրիկյանը նաեւ դժգոհեց, որ քարոզարշավն անցկացնելու համար իր թիմակիցները մարզերում խոչընդոտների են հանդիպել. «Խոչընդոտներ ենք ունենում Արմավիրում, ասում են՝ հունվարի 28-ը տոն է, չենք կարող դահլիճ տրամադրել: Ես ասում եմ՝ գյադեք էս կողմ կանգնեք, երբ նախագահ դառնամ՝ բոլոր գյադեքին իրենց տեղն եմ դնելու»:
Այսօր նրա թիմակիցները Արարատի մարզ են մեկնելու՝ նրա քարոզչությունն անելու:
Արփինե Սիմոնյան
