Այսօր նախագահի թեկնածու Րաֆֆի Հովհաննիսյանը «Ուրբաթ» ակումբում լրագրողներին ներկայացավ շատ բարկացած, մեզ բոլորիս համար անսովոր կերպարով: Լրագրողներից մեկը հետաքրքրվեց, թե ո՞ւր է այն ժպտացող Րաֆֆին, փոխվել է: Պարոն Հովհաննիսյանը պատասխանեց, որ ինքն ապրում է բոլոր 4 եղանակներով. «Սա էլ եմ ես: Սա խաղ չէ ինձ համար, կուսակցախաղ չէ»:
Քարոզարշավի այս 4 օրերի ընթացքում Րաֆֆի Հովհաննիսյանը ապացուցեց լրագրողներին, որ որքան էլ սովոր են վազքի մեջ աշխատել, բայց լավ մարզավիճակում չեն, քանի որ հնարավոր չէր հասցնել նրա հետեւից վազել: Aravot.am-ը հետաքրքրվեց՝ ունե՞ք ինչ-որ բաղադրատոմս, որտեղի՞ց է Ձեր էներգիան, առավոտյան ձո՞ւ եք խմում, ի՞նչ եք անում: Պարոն Հովհաննիսյանը պատասխանեց. «Ինձ համար սա սիրո պայքար է, սիրո ճանապարհ է, ես չեմ ամաչում այս սիրուց՝ հայրենիքի եւ քաղաքացու նկատմամբ: Այդ սերն է, որն ինձ համար շատ ավելի թանկ է, քան ցանկացած նախաճաշ»:
Այսօր «Թեղուտի պաշտպանության» նախաձեռնությունը հայտարարություն էր տարածել, որտեղ կոչ էր արել նախագահի թեկնածուներին հետեւել Անդրիաս Ղուկասյանի օրինակին եւ Հանրային հեռուստաընկերությանն իրենց հասանելիք անվճար եթերաժամը տրամադրել քաղաքացիներին, քանի որ վերջիններս չունեն նման հնարավորություն: Այս առնչությամբ հարցին, թե պատրա՞ստ է ինքը տրամադրել՝ Րաֆֆի Հովհաննիսյանը պատասխանեց. «Դուք գիտեք, որ Սերժ Թանկյանը զորակցում է ինձ՝ առաջին հերթին բնապահպանական մոտիվներով: Պատրաստ եմ կիսել այդ սակավաթանկ հնարավորությունը:
Նորից անդրադառնալով ԿԳ նախարար Արմեն Աշոտյանի ֆեյսբուքյան գրառմանը՝ նախագահի թեկնածուն ասաց. «Նախարարը, վարչապետը չպետք է լինի որեւէ բուհի հոգաբարձուների խորհրդի նախագահ: Պիտի ապակուսակցականացվի գիտխորհուրդը, ուսխորհուրդը: Պետք է ազատ խոսք, ազատ բանավեճ, ինքնավստահ, հավասար դաշտ պիտի ստեղծվի՝ նախագահական ընտրություններին: Ես պետք չուեմ, որ դառնամ նախագահ, արտգործնախարար, որ կարողանամ ուսանողներին հանդիպեմ, տեսակետս ներկայացնեմ, բանավիճեմ: Ես բանավեճ անելու իրավունք ունեմ ընդհանրապես եւ հատկապես՝ այս 25 օրերի ընթացքում»:
Կարդացեք նաև
Հռիփսիմե ՋԵԲԵՋՅԱՆ
