Կարծիք կա, թե հայ հանդիսատեսը ընտրյալ կամ «մոդայիկ» համերգներին, այս դեպքում՝ ջազային, հաճախում է ոչ այնքան լսելու, որքան իրեն ցուցադրելու համար: Այսօր Հայաստանում գործում են տարբեր ոճի եւ ուղղությունների ջազային խմբեր, այդ թվում՝ «Time Report» էթնո-ջազ կվինտետը, «Katuner» ջազ-ռոք սեպտետը, «Chiko & Friends» քառյակը, «Art Voices» խումբը, «Armenian Navy Band»-ը եւ այլն: Երեւանյան ջազ ակումբներում կայանում են նաեւ միջազգային փառատոներ, հյուրընկալվում են արտերկրյա անվանի կատարողներ, գործում է նաեւ «Ռադիո ջազ» ռադիոկայանը:
Ամանորի նախօրյակին «Ուլիխանյան» ջազ ակումբում առաջին անգամ ներկայացավ «FOUR SEASONS JAZZ BAND»-ը, որի մեներգչուհի Սոնա Ումրոյանը ծանոթ է ջազային երաժշտության հայ երկրպագուներին ճանաչված ջազմեն Գարի Քեսայանի կվարտետից: Հիշեցնենք, որ ՀՀ կառավարության անմիջական հրահանգով, դեռեւս 1938թ. ստեղծվեց Հայաստանի պետական ջազ նվագախումբը՝ Արտեմի Այվազյանի ղեկավարությամբ եւ Ցոլակ Վարդազարյանի խմբավարությամբ:
«Առավոտի» հետ զրույցում Սոնան ներկայացնելով «FOUR SEASONS JAZZ BAND»-ը, ասաց, որ երաժիշտները՝ Գարիկ Հայրապետյանը (ստեղնաշարային գործիքներ), Արմեն Հովակիմյանը (կոնտրաբաս), Արթուր Մարտիրոսյանը (հարվածային գործիքներ) պրոֆեսիոնալներ են, հավելելով, թե խմբի ստեղծումը իր մտահղացումն է: Հավանաբար Քեսայանի մոտ «արդարանալու» համար նշեց, որ հատկապես ջազ վոկալիստը տեղում չդոփելու նպատակով պետք է համագործակցի տարբեր ձեռագիր ունեցող խմբերի հետ: Մեր զրուցակիցը չթաքցրեց, որ հետագայում հնարավոր է՝ ներկայանա նաեւ սեփական ստեղծագործություններով: Նաեւ ասաց, որ թեեւ իրենք նպատակ ունեն հնչեցնել տրադիցիոն ջազ (Դյուք Էլինքթոն, Թելոնիուս Մոնկ, Չարլի Փարքեր եւ այլն), այդուհանդերձ էքսպերիմենտներ են անում արդեն՝ ճանաչված երկերին հաղորդելով նոր շունչ ու գույն:
Դիտարկմանը, թե ջազային երգը անհնար է ներկայացնել առանց թեկուզ չնչին կրկնօրինակման, Սոնան պատասխանեց, որ ժամերով լսում է մեծանուն ջազմենների կատարումները, սակայն աշխատում է իրենը «ներմուծել»: Ասաց, որ տարված է հատկապես Արետա Ֆրանկլինի կատարումներով:
Կարդացեք նաև
Հետաքրքրվեցինք՝ առաջին համերգից հետո մասնագետների կողմից ի՞նչ կարծիքներ են հնչել: Սոնան ասաց, որ վաղը «Նարեկացի» արվեստի միությունում կայանալիք համերգին այդ նպատակով հրավիրել են Գարի Քեսայանին, Վահագն Հայրապետյանին, Մարտին Վարդազարյանին, Արմեն Թութունջյանին, Երվանդ Երզնկյանին, Էմմա Պետրոսյանին, Արամոյին եւ մյուսներին:
Տեղեկանալով, որ Սոնան ուսանում է Երեւանի Կոմիտասի անվան պետական կոնսերվատորիայի ջազ-վոկալ բաժնի մագիստրատուրայում, դոցենտ Էմմա Պետրոսյանի դասարանում, խնդրեցինք երգչուհու մասին նրա կարծիքը: «Սիրում եմ աշխատասեր, նպատակասլաց մարդկանց, ովքեր գիտեն՝ ինչ են ուզում: Այդպիսին է Սոնան, ով արդեն մի քանի տարի է, ինչ հանդես է գալիս տարբեր համերգներում՝ համագործակցելով տարբեր խմբերի հետ: Իսկ կոնկրետ ջազ մատուցելու առումով, իհարկե, կա ազդեցություն, ինչը չի նշանակում կրկնօրինակել: Սոնան ունի հարուստ ներաշխարհ, որտեղ կարողանում է հյուսել ու հրամցնել սեփական ասելիքը»,- ասաց Էմմա Պետրոսյանը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
