Վաղվանից Գյումրու նորաբաց առողջապահական կենտրոնում սկսվում են սրտի բարդ ու թանկարժեք վիրահատությունները
Այս մասին քիչ առաջ Aravot.am-ին տեղեկացրեց Գյումրու նորաբաց առողջապահական կենտրոնի տնօրեն Արմեն Իսահակյանը: Ըստ նրա, վաղը մայրաքաղաքի Նորք-Մարաշ բժշկական կենտրոնի տնօրեն Լիդա Կարպովնայի գլխավորությամբ Գյումրի կժամանեն լավագույն սրտաբանները` առաջին անգամ օգտագործելոu քաղաքի հիվանդանոցին պատկանող սարքավորումը:
Նշենք, որ կորոնոգրաֆիան սրտի անոթների ստուգումն ու անհրաժեշտության դեպքում ստենդավորումն է, այն բավականին թանկ հաճույք է:Մասնագետների հավաստմամբ, Հայաստանում ամենաէժան ստենդավորումը մոտ 1 միլիոն դրամ է, սակայն երբեմն հիվանդին անհրաժեշտ է լինում 2-3 ստենդավորում ու բնականաբար ծախսերը հասնում են մինչև 7 միլիոն դրամի:
Ինչևէ, վաղը առաջին անգամ փորձարկվելու է 1 միլիոն դոլարանոց կորոնոգրաֆիայի սարքը, որը , հիվանդանոցի տնօրենի փոխանցմամբ, ի սկզբանե առողջապահական կենտրոնը կառուցելու ու կահավորելու ծրագրում նախատեսված չի եղել: Այն Գյումրու նորաբաց հիվանդանոց է բերվել ՀՀ նախագահ Սերժ Սարգսյանի ցուցումով, ով, ըստ բժիշկ Իսահակյանի, կարևորել է այս մարզի սոցիալական վատ վիճակը: Սարքը, ըստ հիվանդանոցի ղեկավարի, գերմանական է, իր որակով եզակի , նույնիսկ մայրաքաղաքում դժվար է նման որակի սարքավորում ճարելը:
Կարդացեք նաև
Վաղվա վիրահատությունը անվճար է `պետպատվերով, հիվանդանոցի տնօրինությունը ընտրել է վիրահատման ենթակա այսպես ասած «մաքսիմում աղքատ» 20 հիվանդների, որոնցից սակայն առանձանցվել է ամենակարիքավորն ու համեմատաբար առողջական ավելի թեթև վիճակում գտնվողը: Այսինքն նպատակը եղել է այն, որ վիրահատելուց հետո ավելորդ խնդիրներ չծագեն ու մայրաքաղաք տեղափոխելու կարիք չլինի, վիրահատությունը սկսվի ու ավարտվի Գյումրիում: Վիրահատության ավարտից հետո Նորք-Մարաշ բժշկական կենտրոնի մասնագետները նախատեսել են Գյումրու նորաբաց հիվանդանոցից իրենց մոտ վերապատրաստման տանել նաև 2 բուժքույրի և 2 տեխնիկական աշխատողի:
Վաղը Գյումրի ժամանող մասնագետները նախատեսում են նաև հարցազրույց տալ լրատվամիջոցներին: Ի նկատի ունենալով, որ տեխնիկայի դարաշրջանում առաջին անգամն է մեր հանրապետության երկրորդ քաղաքում սրտի վիրահատություն կատարվում, այս փաստը կարելի է համարել առողջապահական պատմական իրադարձություն Գյումրու համար:
Նունե ԱՐԵՎՇԱՏՅԱՆ
