Երուսաղեմի հայոց պատրիարքարանից ստացված հաղորդագրության համաձայն, այսօր պատրիարքարանի լուսարարապետ տեր Նուրհան արքեպիսկոպոս Մանուկյանն ընտրվել է Երուսաղեմի 97-րդ պատրիարք: Անցյալ տարվա հոկտեմբերի 12-ից պատրիարքի աթոռը թափուր էր մնացել Երուսաղեմի Հայոց պատրիարք ամենապատիվ տեր Թորգոմ արքեպիսկոպոս Մանուկյանի մահից հետո:
Հայերի համար Երուսաղեմի պատրիարքարանը զուտ հոգեւոր կառույց չէ. Երուսաղեմում գտնվող տիրոջ գերեզմանի Սուրբ Հարության տաճարը տնօրինում են 3՝ հույն ուղղափառ, հայ առաքելական եւ կաթոլիկ եկեղեցիները:
Տեր Նուրհան արքեպիսկոպոս Մանուկյանը ծնվել է 1948 թվականին Հալեպում, ի թիվս այլ ծառայությունների, նա եղել է Ժառանգավորաց վարժարանի տեսուչ, տարբեր տարիներին Շվեյցարիայի եւ Իսրայելի հոգեւոր թեմի հովիվ: 2009 թվականին Նուրհան սրբազանը նշանակվել է պատրիարքական փոխանորդ: Երուսաղեմի հայոց պատրիարքարանից ստացված հաղորդագրության մեջ ասվում է, որ տեր Նուրհան արքեպիսկոպոս Մանուկյանը ազդեցիկ հոգեւորական է, որի ներկայությունը ոչ միայն կայունության գրավական է կառույցում, այլեւ հռչակավոր նախնիների ժառանգության հավերժացման:
Գոհար ՀԱԿՈԲՅԱՆ
«2009 թվականին տեր Նուրհանը նշանակել է պատրիարքական փոխանորդ»։ Մեկ նախադասության մեջ 2 սխալ կա. երևի ուզում էիք ասել «նշանակվել», իսկ մյուսը՝ արքեպիսկոպոսին ասում են «Նուրհան սրբազան» և ոչ թե «տեր Նուրհան». տարրական բաներ են, որ պետք է իմանալ։
Շնորհակալություն, վրիպումները շտկված են: