Նման տեսահոլովակներ արտադրողները պետք է պատժվեն: Անժելա Սարգսյանի պոռնոգրաֆիկ նկարները տարածողին 6 տարով դատեցին, իսկ ինչու չդատել դրոշը ծաղրողին
«Թուրքերի գլխին այդքան խելք չկա հասկանալու համար, որ մեր հերոսին ձեռք առնելը անամոթություն է: Անգամ հայ խեղկատակներ կան, ովքեր օտար լեզվով տեսանյութեր են պատրաստում, կոչ անելով` «Յա Գարեգին Նժդեհ»»,-այսօր լրագրողների հետ հանդիպման ժամանակ «Գարեգին Նժդեհ» ֆիլմի վերաբերյալ համացանցում տեղադրված տեսանյութերի մասին նշեց ռեժիսոր Արշակ Զաքարյանը:
Նրա պնդմամբ՝ ադրբեջանական բոլոր կայքերը տարածում են այս անհիմն տեսանյութերը, ստեղծողները հայեր են, իսկ թուրքերը կօգտվեն այդ առիթից.
«Ոմն Արթուր Պետրոսյանը, ով իրեն համարում է ազգասեր ակտիվիստ, պատրաստել է նկար, որը ապահովիչի տեսք ունի, վրան հայոց դրոշն ու գրված ՀՀԿ-ի կոչը`«Դեպի ապահով Հայաստան», կան նման բազմաթիվ անկիրթ նկարներ եւ տեսահոլովակներ, որոնք պարզապես ամոթ են: Դա անպատժելության դրսեւորում ու անհեթեթություն է»:
Ռեժիսորը պնդում է, որ ցանկացած մարդու գործ կարելի է քննադատել միայն գործը դիտելուց հետո, ինչ մեղքը թաքցնի` Քեշիշյանի ֆիլմերը չի սիրում: Ֆիլմը, իհարկե, աղմուկ բարձրացնելու էր, հայերը սիրում են գլխանց բամբասել ու քննադատել.
«Գարեգին Նժդեհը որեւէ կուսակցության չի պատկանում` ՀՀԿ-ն պտուղ էլ չի եղել, երբ Նժդեհն է գոյություն ունեցել: Նա մեծություն է, անհատ, որին սեփականաշնորհելը սխալ է, ուրիշ բան, որ կուսակցությունը կողմ է նրա գաղափարներին, բայց նրա անունը տեղի- անտեղի շահարկելն անիմաստ է»:
Գարեգին Նժդեհի դերակատար Արտաշես Ալեքսանյանը նույնպես պետք է ներկա լիներ հանդիպմանը, սակայն, ինչ-ինչ պատճառներից դրդված, նա չեկավ, ինչը զայրացրել էր ռեժիսորին.
«Մեր ազգի որեւէ սրբություն չի կարելի ոտնակոխ անել: Նման տեսահոլովակներ արտադրողները պետք է պատժվեն: Անժելա Սարգսյանի պոռնոգրաֆիկ նկարները տարածողին 6 տարով դատեցին, իսկ ինչու չդատել դրոշը ծաղրողին: Մենք գաղափարական պատերազմի մեջ ենք, այն չի ավարտվել, մենք մեզ ենք դավաճանում»:
Անժելա ՇԱՀՈՒՄՅԱՆ
