Հարկային տեսչությունը եւ վերահսկիչ պալատը նախկինում Նոյեմբերյանի հիվանդանոցի եւ պոլիկլինիկայի 2007-2009 թթ. գործունեության ստուգումներ են անցկացրել: Դրա արդյունքում հայտնաբերվել են խախտումներ, Նոյեմբերյանի հիվանդանոցում շուրջ 40 միլիոն դրամի պարտք է առաջացել: Դրանից 8,5 միլիոն դրամը հարկային տուգանքներն են : 2011թ. մայիսին Նոյեմբերյանի հիվանդանոցի եւ պոլիկլինիկայի միավորումից առաջացել է Նոյեմբերյանի բժշկական կենտրոնը: Այդ հիմնարկությունը սկսել է աստիճանաբար մարել պարտքերը: 2011թ. դեկտեմբերին ԲԿ-ի պարտքերը կազմել են 29 միլիոն դրամ: Նոյեմբերյանի Նիկոլայ Նասիբյանի անվան բժշկական կենտրոնի տնօրեն Աշոտ Գոզալյանն ասում է, որ պարտքի ներկայիս չափը ՝ 16,8 միլիոն դրամ, կարող էր ավելի քիչ լինել: Դրանից 2,5 միլիոն դրամը ընթացիկ պարտք է, այն գոյանում է դիալեզի միկրոբաժանմունքի գործունեությունից: Այսինքն՝ միկրոբաժանմունքի համար ԲԿ-ն ապառիկ կերպով դեղամիջոցներ եւ անհրաժեշտ նյութեր է գնում, որի գումարը պետության կողմից վճարվում է: 2012թ. դեկտեմբերին Նոյեմբերյանի ԲԿ-ին, ծննդաբերական ծառայությունների գծով, շնորհվել է ցածր կարգավիճակ: Նման ցածր կարգավիճակ է շնորհվել նաեւ հանրապետության այլ բուժհիմնարկների: Ցածր կարգ է տրվել, որովհետեւ Նոյեմբերյանի ԲԿ-ն չունի 4 գինեկոլոգ, համապատասխան սարքավորումներով կահավորված լաբորատորիա: Նման պայմաններ չունեցող բժշկական կենտրոններին թույլատրվել է անհրաժեշտության դեպքում ծննդաբերությունների ընդհանուր թվի մինչեւ 10 տոկոսի դեպքում(բայց ոչ ավելի թվով) կատարել կեսարյան հատում: 2012թ. օգոստոս-դեկտեմբեր ամիսներին Նոյեմբերյանի բժշկական կենտրոնում կատարվել է թվով 16 կեսարյան հատում: Ա. Գյոզալյանն ասում է, որ իրենց հիմնարկությանը չի վճարվել այդ վիրահատությունների համար պետբյուջեից հասանելիք 1,4 միլիոն դրամը: Բժշկական կենտրոնն այդ վիրահատություններին մասնակցած բժիշկներին վճարել է համապատասխան կերպով, մինչդեռ այդ բժիշկները պետք է վարձատրվեն այնպես, կարծես թե նորածինները ոչ թե կեսարյան հատումով, այլե սովորական ձեւով, առանց բարդությունների են ծնվել: Այդ որոշման հետեւանքները մեղմելու համար կառավարությունը նոր որոշում է ընդունել, որով կապիտալ նորոգված, կահավորված բժշկական կենտրոններին թույլատրվում է ծննդաբերությունների ընդհանուր թվի մինչեւ 20 տոկոսը կատարել կեսարյան հատումով: Նոյեմբերյանի ԲԿ-ն դրանց թվին է դասվում, քանզի «Հայաստան» համահայկական հիմնադրամի միջոցներով 2011թ. այն հիմնանորոգվել է : ԲԿ-ի տնօրենն ասաց, որ անցյալ տարի իրենց հիմնարկությունը վճարել է զինակոչիկներին բժշկական զննության համար Երեւան գործուղելու համար անհրաժեշտ 164 հազար դրամ գումարը, սակայն պետբյուջեի կողմից փոխհատուցում չի ստացել: Նոյեմբերյանի ԲԿ-ի խնդիրները ֆինանսականով չեն սպառվում: Կենտրոնը չունի ուրոլոգ(միզուղիների եւ երիկամների մասնագետ): Կենտրոնի վիրաբույժներին փոխարինողներ չկան: «Երբ գործի բերումով Երեւան եմ գնում, 100 անգամ Աստված եմ կանչում, որ այդ ժամանակ Նոյեմբերյանում ծանր դեպք, վիրահատության կարիք չլինի»,- ասում է Աշոտ Գյոզալյանը, ով կատարում է որովայնի խոռոչի օրգանների վիրահատություններ: Նա առողջապահության նախարարության առաջ խնդիր է դրել, որպեսզի սահմանագոտու ԲԿ-ում կահավորվի երկրորդ վիրահատարանը:
Ոսկան Սարգսյան
