«Մեր ժամանակակիցներին ըստ արժանվույն պետք է ներկայացնել եւ արժանին հատուցել: Կա բարձր սկզբունք՝ բարձրացրու, որ բարձրանաս, հարգիր, որ հարգվես»,-այսօր լրագրողների հետ հանդիպման ժամանակ նշեց «Սայաթ-Նովա» աշուղական երգի վաստակավոր անսամբլի գեղարվեստական ղեկավար Թովմաս Պողոսյանը:
Հունվարի 30-ին «Արամ Խաչատրյան» համերգասրահում տեղի է ունենալու «Աստղով եկա» հանդիպում-երեկո, նվիրված ՀՀ ժողովրդական արտիստուհի Օֆելյա Համբարձումյանին:
Թովմաս Պողոսյանի համոզմամբ՝ երգչուհին աստղով եկավ ու փայլատակեց տասնամյակներ շարունակ.
«Հայոց երգի թագուհին է Օֆելյան. շատերը փորձեցին նմանակել նրան, սակայն դա միայն փորձ մնաց: Նա անհաս բարձունք է՝ երեկոն նվիրելու ենք մեր սիրելի երգչուհուն: Ելույթները ընդմիջվելու են փոքրիկ տեսանյութերով, որտեղ կներկայացնենք Օֆելյայի կատարումները»:
Կարդացեք նաև
Գեղարվեստական ղեկավարի խոսքով՝ երգչուհին մեծ երեւույթ է հայ երգարվեստում, ցավով պետք է ասել, որ այսօր նա եթերում չկա.
«Մեզ հետ ապրում է մի երգչուհի, ում երիտասարդ սերունդը չի ճանաչում, տարիներ առաջ նա շողշողում էր հայոց եթերում, բոլորը փորձում էին նմանվել, իսկ այսօր նրան չեն ճանաչում, դա ողբերգական է: Նա բախտ ունեցավ իր նախորդների հետ աշխատել, տեսնել, ընկալել նրանց արժեքները, որոնք անցկացրեց իր պրիզմայի միջով»:
Բանախոսի պնդմամբ՝ երգչի առաջնային արժեքը ինքնատիպությունն է: Նա վստահ է, որ մեծ արվեստագետներ մեր ժողովուրդը դեռ կծնի, քանզի հայ կնոջ արգանդը միշտ բեղուն է եղել:
Անժելա ՇԱՀՈՒՄՅԱՆ
