Այսօր Րաֆֆի Հովհաննիսյանն իր նախընտրական քարոզարշավը սկսեց իրականացնել Էրեբունի համայնքում: Հայկական իրականության համար խիստ տարօրինակ այդ քարոզարշավը մարդկանց շոկի մեջ էր գցել: Սկզբում Րաֆֆի Հովհաննիսյանը մտավ հագուստի տոնավաճառ: Շատերը վստահեցնում էին՝ «Ես քեզ եմ ընտրելու, ցավդ տանեմ», «մեր ամբողջ ընտանիքը քեզ է ընտրելու», «7 հոգու ձեն քոնն ա» եւ այլն: Ի պատասխան՝ Րաֆֆի Հովհաննիսյանն ասում էր՝ «արժանի լինեմ»:
Հագուստի տոնավաճառի վաճառականներից մեկը պարոն Հովհաննիսյանին բարեւելուց հետո նրան հիշեցրեց, որ նախորդ ընտրություններին՝ 2008-ին նույնպես այցելել է իրենց, առեւտրականներով շամպայն են գնել, որ շնորհավորեն նրան, Րաֆֆի Հովհաննիսյանը թույլ չի տվել. «Ասեց՝ հիմա մի շնորհավորեք, հիմա հարկավոր չէ»,- պատմեց կինը եւ վստահեցրեց, որ շամպայնը դեռ պահում է, կա, մնում է հաղթանակը:
Վաճառականներից մեկը դժգոհեց. «Առեւտուր արեք, որ ընտրենք: Որ չանեք՝ չենք ընտրելու»: Րաֆֆի Հովհաննիսյանը «շանտաժին» չտրվեց. «Առեւտուրը՝ ընտրություններից հետո»:
Նա մտնում էր «Սթար», «Երեւան Սիթի» սուպերմարկետներ, բարեւում, գնում մեկ ծամոն կամ կոնֆետ ու ժպտալով դուրս գալիս՝ իր հետեւից թողնելով զարմացած դեմքեր ու արտահայտություններ՝ «Ախչի՛, էս Րաֆֆի Հովհաննիսյանը չի՞»:
Կարդացեք նաև
Պարոն Հովհաննիսյանը ճանապարհին հանդիպած կանանց այնպիսի ռոմանտիկ հաճոյախոսություններ էր անում, որ վերջիններս ուղղակի շոյվում էին: Տիկին Արմինեի ականջից հեռու՝ տոնավաճառի կանանցից մեկին Րաֆֆի Հովհաննիսյանը խոստացավ՝ «Քո գեղեցիկ, փայլուն, մելամաղձոտ աչքերը պիտի ժպտան»: Կինն ուղղակի ցնծության մեջ էր:
Նախագահի թեկնածուն անակնկալ մտնում էր կանանց եւ տղամարդկանց վարսավիրանոցներ, բարեւում, «անուշ լինի» ասում ու հեռանում:
Մթերային խանութներից մեկում Րաֆֆի Հովհաննիսյանը խանութպաններից հետաքրքրվեց՝ առեւտուր կա՞, հարկային տեսչությունը ձեզ նեղո՞ւմ է: Մարդիկ պատասխանեցին, որ այս տարի նորմալ է եղել, առեւտուրն էլ պակասել է: Րաֆֆի Հովհաննիսյանը խոստացավ, որ ընտրվելու դեպքում «մեծերին»՝ խոշոր բիզնեսը կբերի հարկային դաշտ եւ այդ ստվերի հաշվին կազատի հարկերից փոքր ու միջին բիզնեսը:
Այնուհետեւ «Ժառանգության» առաջնորդն այցելեց նաեւ ատամնաբուժական կենտրոն:
Քարոզարշավը շարունակվեց Էրեբունի համայնքի պատահական մի «պերաշկիանոցում», որտեղից պարոն Հովհաննիսյանը գնեց կարտոֆիլով կարկանդակներ, բուտերբրոդներ, բուլկիներ, որոնց մի մասը բաժանեց փողոցում՝ դպրոցականների, երեխաների:
«Պերաշկին ընտրության հետ կապ չունի: Մարդկային պահանջ է ուղղակի»,- «պերաշկիանոցի» կանանց բացատրեց պարոն Հովհաննիսյանը: «Տա Աստված, դուք անցնեք»,- մաղթեցին կանայք:
Ճանապարհին մեզ միացավ 8-ամյա Ռադիկը: Նա հանրակացարանում էր ապրում: Փողոցում պատահաբար տեսնելով Րաֆֆի Հովհաննիսյանին՝ ուզեց ճշտել՝ իսկակա՞ն Րաֆֆին է, թե՞ չէ: Երեխայի մայրը հավաքարար էր աշխատում մայրաքաղաքի պիցցայանոցներից մեկում, հայրը՝ գործազուրկ էր:
Քարոզարշավի ընթացքում Րաֆֆի Հովհաննիսյանը հանդիպեց նաեւ ավտովթարի, բարեւեց վարորդներին ու պետավտոտեսուչներին, մաղթեց բարի ընտրություններ:
Սիրելի ընթերցողներ, կրկին հիշեցնում ենք, որ հրապարակվում են միայն հայատառ մեկնաբանությունները:
Իրավիճակի իսկական պատկերը քաղաքագետի համար հասկանալի է դառնում միայն հասարակ քաղաքացիների հետ իրական շփման ճանապաչհով: Անգամ մեկ վարկյան տևողությամբ շփումը հասկացող մարդուն շատ բան է ասում: Իսկ որոշ ծախու լրատվական միջոցներ արել են և կշարունակեն անելու իրենց անշնորհակալ կեղտոտ գործը: