Ադրբեջանի Հանրապետության կողմից ընդունված օրենքը թույլատրում է ադրբեջանական օդային սահմանը հատած ցանկացած փոխադրամիջոցի ռազմական միջամտությամբ կանխել, մասնավորապես Արցախի տարածքով քաղաքացիական ինքնաթիռների անցումը: Նրանք սպառնում են հարվածել քաղաքացիական ինքնաթիռներին, ինչն անգամ պատերազմական իրավիճակում համարվում է պատերազմական հանցագործություն: Այս մասին այսօր «Արմատ» մամուլի ակումբում ասաց միջազգային իրավունքի փորձագետ և ադրբեջանագետ Սարգիս Ասատրյանը:
Aravot.am-ի այն հարցին, թե այս դեպքում ինչո ՞ւ են լռում ԵԱՀԿ Մինսկի խմբի համանախագահները և ի ՞նչ է ասում միջազգային իրավական քաղաքագիտական միտքն այս դեպքում, Ասատրյանը պատասխանեց. «Այս կոնտեքստում զարմանալի է միջազգային կառույցների արձագանքները, ովքեր ոչ ադեկվատ են արձագանքում հայտարարություններին և օրենքներին: Այս պարագայում պետք է նշեմ, որ ադրբեջանական քարոզչությունը և մեծ փողերը անում են իրենց սև գործը»:
Ըստ բանախոսի՝ Ադրբեջանը միջազգային ասպարեզներում անում է ամեն բան՝ իր անունը բարձր պահելու և Հայաստանը գցելու համար և որ Հայաստանը ավելի պասիվ է քարոզչական պատերազմում, քան Ադրբեջանը:
Ասատրյանն ընդգծում է, որ այս ամենը Ադրբեջանի կողմից հերթական քարոզչական քայլ է, քանի որ նրանք գիտակցում են, որ Հայաստանը և ԼՂՀ-ն ունեն բավական հզոր հակաօդային պաշտպանության համակարգ:
Կարդացեք նաև
Քրիստինա ՄԻՐԶՈՅԱՆ
