Այսօր «Հայացք» ակումբում ազգագրագետ Հրանուշ Խառատյանը եւ Հայկական հոգեբուժական ասոցիացիայի նախագահ, համաշխարհային հոգեբուժական ասոցիացիայի պատվավոր անդամ Արմեն Սողոյանը անդրադարձան «Գարեգին Նժդեհ» ֆիլմին եւ վերջինիս շուրջ սոցցանցերում տարածված քննադատություններին:
«Դժվար է ասել, թե ֆիլմով ապականվել է Նժդեհի կերպարը: Եթե որոշ մարդիկ նման կարծիք են արտահայտել, ուրեմն նրանց պատկերացումները Նժդեհի կերպարի մասին այն տեղում չեն, որտեղ պետք է լինեն: Մյուս կողմից, մեծ բան ձեռնարկելուց պետք է պատրաստվել դրան, որպեսզի նման խոսակցությունների տեղ չլինի: Ինչ ուզում ես արա՝ խոսակցություններ միշտ էլ կլինեն»,-ասաց Սողոյանը:
Հրանուշ Խառատյանի խոսքով. «Իրականում հասարակությունը ծանոթ չէ Նժհեդի կերպարին: Հանրապետական կուսակցությունը, որը Նժդեհին ընդունել է որպես առանցքային կերպար, բավարար ջանք չի գործադրում՝ այդ կերպարը պատճաշ մակարդակով ներկայացնելու համար: Եթե անգամ ներկայացնում է, ապա՝ նեղ հայացքով: Նժդեհի կերպարն ինչ որ առումով գրոտեսկային է դարձել, քանի որ հատկապես վերջին տասը տարիներին, մեր երկրում հերոսի կերպարի ձեւավորման ընթացքը դարձել է անհասկանալի, անգամ՝ անընդունելի: Հերոսանում են անձինք, որոնք ակնհայտորեն չափազանց հեռու են հերոսի չափանիշներից: Այդպես հերոս բառի տարողությունն ինչ- որ տեղ վերածվում է ծաղրապատկերի: Սա նույնպես դեր է խաղում, որ Նժդեհին ներկայացնելու Հանրապետական կուսակցության մեթոդը հանդիպի դիմադրության»:
Լուիզա ՍՈՒՔԻԱՍՅԱՆ
