«Հետընտրական հուսախաբություններ չեն լինի, քանի որ գիտենք, թե նախագահական ընտրություններն ինչ ելք կունենան»,-այսօր «Հայացք» ակումբում ասաց ազգագրագետ Հրանուշ Խառատյանը: Նրա խոսքով. «Երկրում ձեւավորվել են ոչ թե իրավական, այլ անձնական կապեր, որոնց տրամաբանական շարունակությունն են համարվում ընտրությունները: Առհասարակ, մարդիկ ընտրում են նրան, ումից անձնական սպասելիքներ ունեն: Իսկ արտագաղթը «տանում» է նրանց, ովքեր չունեն անձնական կապեր»:
Խառատյանն արձանագրեց, որ նախընտրական մրցապայքարում նոր խաղացողներ են ի հայտ եկել, որոնք նոր պատկերացումներ են առաջադրում ընտրական գործընթացի վերաբերյալ. «Ծանոթացել եմ թեկնածուների ծրագրերին, սակայն չեմ տեսել, թե ինչպես են նրանք պատրաստվում լուծում տալ առաջադրված խնդիրներին: Օրինակ, գործող նախագահի աշնանային հանդիպումների հռետորաբանությունը, կառավարության նիստերի ժամանակ բարձրացրած հարցադրումները սկզբունքորեն ցույց են տալիս, որ նրա ապագա նախընտրական դրսեւորումները վերաբերում են դատարանների, պաշտպանության, բանակի եւ կոռուպցիոն խնդիրներին: Բայց ես չեմ հավատում, որ երկրի գործող նախագահը արդարություն կհաստատի երկրում, որովհետեւ նրա նախագահության շրջանը հակառակ պատկերն է ցույց տվել»:
Անդրադառնալով նախագահի թեկնածու Անդրիաս Ղուկասյանին, ով հացադուլ է հայտարարել, ազգագրագետն ասաց, որ հացադուլը քաղաքական նոր մշակույթ է եւ կարող է հետաքրքրություն առաջացնել. «Ղուկասյանին լուրջ մարդ եմ համարում, բայց նա, լինելով քաղաքական դաշտում ոչ այդքան հայտնի, հացադուլի միջոցով իր հայացքներն է ճանաչելի դարձնում»:
Տիկին Խառատյանը նաեւ կարծիք հայտնեց, որ տեղական ինքնակառավարման մարմինների ընտրությունները քաղաքականացվում են. «ՏԻՄ ղեկավարներն ամեն գնով դարձան կուսակցականներ, մասնավորապես՝ իշխանության ներկայացուցիչներ: Սա նույնպես ընտրություններով անձնական խնդիրներ լուծելու տարբերակ է»:
Կարդացեք նաև
Լուիզա ՍՈՒՔԻԱՍՅԱՆ
