Իշխող վարչախումբը նախընտրական փուլ է մտել լեգիտիմության դեֆիցիտով եւ բազմաթիվ չլուծված խնդիրներով: Այսօր «Peeplemeter » ակումբում ասաց քաղաքական վերլուծաբան Էդգար Վարդանյանը:
«Սարգսյանի պաշտոնավարության ժամկետի վերջում ռեժիմի բնույթը մնում է այնպիսին, ինչպիսին էր մինչեւ նրա պաշտոնավարության սկիզբը՝ ոչ ժողովրդավարական»,- շարունակեց պարոն Վարդանյանը:
Նա նկատեց, որ Սերժ Սարգսյանի թիմը այս ընտրություններին թեկնածուների ոչ թե սեւ PR-ով է զբաղված, այլ նրանց համար անլուրջ, թեթեւսոլիկի կերպար ստեղծելով. «Սակայն վարչախմբի համար արդեն իսկ առաջացել են որոշակի խնդիրներ, որոնք ունեն նրանց խաղաթղթերը հիմնավորին խառնելու պոտենցիալ»:
Նա նկատի ունի ԵԽԽՎ պատվիրակության վերջերս արձանագրած մտահոգությունները ընտրացուցակների վերաբերյալ. «Դրան հետեւեց իշխանությունների կոշտ պատասխանը, ինչը վկայում է, որ վարչախումբը խիստ անհանգստացած է այդ հայտարարության հնարավոր հետեւանքներով»:
Կարդացեք նաև
Վերլուծաբանն այն կարծիքին է, որ ռադիկալ փոփոխությունների համար քաղաքական ուժերը պետք է համագործակցության ձեւաչափ գտնեն՝ հակառակ դեպքում մեկը մյուսին խանգարելով կթուլացնեն սեփական դիրքերը. «Կարծում եմ՝ միավորող գործոն կարող է լինել ընդդեմ ռեժիմի գաղափարը»:
Անդրադառնալով հացադուլի դուրս եկած նախագահի թեկնածու Անդրիաս Ղուկասյանին, պարոն Վարդանյանն ասաց, որ դա ոչ թե քաղաքական դիվիդենդներ շահելու, այլ քաղաքական նոր իրավիճակ ստեղծելու նպատակ ունի:
Արփինե ՍԻՄՈՆՅԱՆ
