Վերջերս անդրադարձել էինք Տավուշի մարզպետարանի հարեւանությամբ, Իջեւանի քաղաքային զբոսայգում քանդակներից մեկի գլխատմանը եւ ոստիկանների կողմից այդ բարբարոսության հեղինակի բացահայտմանը:
Հունվարի 22-ին լինելով այգում՝ տեսանք, որ գրեթե ամեն տեղ խոշոր եւ մանր եղջերավոր անասունների արտաթորանք է: Թրիք էր թափված խորհրդային տարիներին Իջեւանում անցկացվող միջազգային սիմպոզիումի ժամանակ արարված քանդակների շրջակայքում, ծառերի մոտ, հետիոտնի անցուղիներում: Կարծես թե այդտեղ ոչխարի հոտեր եւ կովերի նախիրներ են արածեցրել: Նախկինում նշել ենք, որ այգին ցերեկային ժամերին հսկում են քաղաքային կոմունալ ձեռնարկության 2 պահակներ: Գուցե անասունները գիշերն են արածեցրել կամ դրանք առանց հսկողության մնացած, թափառող կենդանիներ են:
Իջեւանում թափառող կովերի եւ ձիերի մասին «Առավոտը» նախկինում տեղեկացրել է:
Ոսկան ՍԱՐԳՍՅԱՆ
