Այսպես են մտածում Football 365.com եվրոպական կայքի լրագրողները:
«Football365.com»-ը կազմել է այն ֆուտբոլիստների ցուցակը, որոնց անունները թեեւ չեն հնչում լայն արձագանք ունեցող տրանսֆերային լուրերում, կարող են ուժեղացնել ցանկացած գրանդ ակումբ: Արտասահմանցի լրագրողների այս ցուցակում առաջինը Հայաստանի ազգային հավաքականի եւ Դոնեցկի «Շախտյորի» կիսապաշտպան Հենրիխ Մխիթարյանն է, որի մասին գրված է. «Եթե դուք մինչեւ հիմա տեղեկացված չէք «Շախտյորի» խաղացող Հենրիխ Մխիթարյանի մասին, հավանաբար, նրանից է, որ ֆուտբոլիստի խիստ բարդ անունը դժվար է արտասանել: Հարձակողական ոճի հայ կիսապաշտպանը «Շախտյորի» աստղերից մեկն է: Մխիթարյանը բոլորին ցնցել է այս մրցաշրջանում Չեմպիոնների լիգայում իր մրցելույթներով եւ մեծ ներդրում ունի «հանքափորների»՝ առանց պարտության 37 հանդիպումների շարքում, որն ընդհատվեց միայն «Ստեմֆորդ Բրիջում» Լոնդոնի «Չելսիից» կրած 2:3 հաշվով պարտությունով: Ֆուտբոլիստի առավելություններն են՝ գերազանց տեղաշարժը խաղադաշտում, Ճշգրիտ փոխանցումները եւ մշտական նպատակաուղղվածությունը մրցակցի դարպասին: Մխիթարյանը «Շախտյորի» ամենահետաքրքիր պոտենցյալ տրանսֆերներից է: Կցանկանա՞ Մխիթարյանը հեռանալ իր ակումբից, որի հետ երկու տարում հինգ տիտղոս է նվաճել, արդեն այլ խնդիր է», – գրում է կայքը:
Տրանսֆերային տոպ-10-ում երկրորդը նշված է Բենյատ Էտչեբերիայի («Բետիս»), երրորդում՝ Էռնանեսի («Լացիո») անունը:
Աշոտ ՀԱԿՈԲՅԱՆ
