Օրերս Գյումրիի քաղաքապեւո Սամվել Բալասանյանը հայտարարեց, որ սատարելու է Սերժ Սարգսյանին։ Նման հայտարարություններ արել էին կամ առնվազն գործող նախագահին սատարելու ցանկություն էին հայտնել նաեւ ԲՀԿ-ական շատ այլ համայնքապետեր։ Ի՞նչ է ստացվում՝ ԲՀԿ-ն հիմա սատարո՞ւմ է Սերժ Սարգսյանին, թե՞ ոչ մեկին չի սատարում։
Ի՞նչ կարող է արժենալ Սամվել Բալասանյանի միանձնյա սատարումը Սերժ Սարգսյանին։ Այդ սատարումը մի քոռ գրոշ էլ չարժե, եթե ԲՀԿ Գյումրիի կառույցը չի հետեւում իր քաղաքապետին։ Բնականաբար, նույնկերպ պետք է վարվեն նաեւ ԲՀԿ-ական համայնքապետեր ունեցող բոլոր համայնքների ԲՀԿ-ականները։ Եվ այս ամենի արդյունքում ստացվում է մի զավեշտալի պատկեր՝ ԲՀԿ-ն իր համայնքապետերով ու նրանց ենթարկվող շարքերով, հանուն համայնքի եւ համայնքապետի ապահովության, սատարում է գործող նախագահ, նախագահի թեկնածու Սերժ Սարգսյանին, իսկ Նաիրա Զոհրաբյանն ու Տիգրան Ուրիխանյանը, Երեւանում նստած, ոչ մեկին չեն սատարում։ Ցիրկ՝ բառիս բուն իմաստով։ Հարցն ուժի մեջ է՝ ինչպե՞ս է դա ձեզ հաջողվում, հարգելի ԲՀԿ-ականներ։
Չի բացառվոմ, որ Սամվել Բալասանյանի օրինակով, ով հանուն Գյումրիի սատարում է Սերժ Սարգսյանին եւ Գյումրիի շահերը բարձր է դասում ԲՀԿ-ի շահերից (սա արդեն Գագիկ Ծառուկյանի հատուկ հանձնարարականն է), ԲՀԿ ԱԺ խմբակցությունն էլ որոշի՝ հանուն ԱԺ-ի եւ խնամի Հովիկ Աբրահամյանի, սատարել նախագահ Սարգսյանին։ Այո, չի բացառվում, որովհետեւ քաղաքականության մեջ ոչ միայն չի կարելի ոչինչ բացառել, այլեւ չի կարելի ինքզինքը հեղափոխական հռչակել՝ չիմանալով ինչ է հեղափոխությունը։
Արդեն կարելի է միանշանակ պնդել, որ այս նախագահական ընտրություններում հանգամանքները ԲՀԿ-ի համար հեչ լավ չդասավորվեցին։ Հիմա ոչ կարողանում են լիարժեք սատարել, ոչ էլ չսատարելն է ստացվում։ Ի՞նչ անեն։ Հարցը, թերեւս, կարողանա լուծել Գագիկ Ծառուկյանը, բայց նա էլ այս օրերին խիստ զբաղված է։ Ասում են՝ մտմտում է՝ գրե՞լ դիմում, թե՞ չգրել դիմում կուսակցության նախագահի պաշտոնից հրաժարվելու մասին։ Նկատենք, սակայն, որ թե գրելու եւ թե չգրելու դեպքում նա դեռ պատասխան չի տվել այն բանի համար, որ մեկուկես տարի շարունակ, չի բացառվում, որ հենց իշխանության հրահանգով, այսպես ասպատակեց ու ամայացրեց ընդդիմադիր դաշտը։
Կարդացեք նաև
Հուսանք, որ Գագիկ Ծառուկյանը կխոսի այս մասին, բայց արդեն ոչ թե հաջորդ, այլ վերջին դասին։
Էդիկ ԱՆԴՐԵԱՍՅԱՆ
«Հրապարակ»
