Արտակ Նազարյանի գործով դատական նիստը հերթական անգամ չկայացավ
Արտակ Նազարյանի մահվան գործով դատավարության հունվարի 22-ի նիստից բացակայում էին ամբաստանյալ 3 զինվորների պաշտպաններ Ալվարդ Մնացականյանը եւ Ազատ Շաբազյանը: Վերջինս դատական նիստերին հազվադեպ է մասնակցում: Ալվարդ Մնացականյանը դատարանին հեռախոսով հայտնել էր, որ ինքը արյան բարձր ճնշում ունի եւ չի կարող նիստին մասնակցել: Նաեւ հայտնել էր, որ իր պաշտպանյալների հետ որոշել է՝ դատական նիստը կարող է անցկացվել իր բացակայությամբ: Դատավոր Սամվել Մարդանյանն ասաց, որ օրենքը դա թույլ չի տալիս, քանզի խախտվում է ամբաստանյալների պաշտպանական իրավունքը: Դատավորն ամբաստանյալներին ասաց, որ նրանք երկու պաշտպան ունեն, եւ նրանցից գոնե մեկը պետք է մասնակցի նիստին: Դատավորը հայտարարեց, որ պաշտպան Ա. Մնացականյանը պետք է դատարան ներկայացնի իր վատառողջ լինելու մասին բժշկական փաստաթուղթ, այլապես դատարանը նրա անհարգելի բացակայության առթիվ միջոցներ կձեռնարկի:
Ս. Մարդանյանը որոշեց նիստը հետաձգել, ինչը հարուցեց պաշտպանական կողմի դժգոհությունը: Ամբաստանյալ Վահագն Հայրապետյանի պաշտպան Լեւոն Պողոսյանը հայտարարեց, որ ինքը, հիվանդ լինելով, Երեւանից ներկայացել է Իջեւանում կայացող դատին: Քրեական գործով գլխավոր ամբաստանյալ Հակոբ Մանուկյանի պաշտպան Հրանտ Գեւորգյանն ասաց, որ ինքը վատառողջ է, նախորդ նիստից հետո Երեւան վերադառնալու ճանապարհին արյան ճնշումը բարձրացել է, եւ ինքը հազիվ է փրկվել ինֆարկտից: Դատավոր Սամվել Մարդանյանը հայտարարեց, որ ինքը եւս հիվանդ է, սակայն ներկայացել է աշխատանքի: Տուժողի իրավահաջորդի ներկայացուցիչ, իրավապաշտպան Ռուբեն Մարտիրոսյանը ցանկանում էր միջնորդությամբ հանդես գալ: Սակայն դատավորն առարկեց, ասելով, որ նիստը չի սկսվել, այն հետաձգվում է: Այս գործով հաջորդ նիստը նշանակված է հունվարի 29-ին, ժամը 14-ին:
Կարդացեք նաև
Ոսկան ՍԱՐԳՍՅԱՆ
